Onyń qandaı týyndysyn alsań da, Qazaq eliniń baıtaq dalasy men qalasy, tirshilik ıeleri jarasym taýyp turady. О́tken aptada elorda tórindegi Oqýshylar saraıynyń «Astana Art Laın» galereıasynda óner ıesiniń «Shabyt» atty kórmesi uıymdastyrylǵan edi. Oǵan Shynybaıdyń 56 týyndysy qoıylǵan.
Bul týyndylardyń negizgi jelisin tabıǵat tylsymdary quraıdy eken. Ásirese, tórt mezgildi túgendegen shyǵarmalar, Almatynyń tabıǵaty, Alataý baýraıyndaǵy botanyń kózindeı Esik kóli erekshe kórinis tapqan.
Qazaqstan Sýretshiler jáne Eýrazııa dızaınerler odaqtarynyń múshesi, Qazaq ulttyq óner ýnıversıtetiniń oqytýshysy Shynybaı Pirimbaevtyń kindik qany tamǵan jeri Aral óńirindegi Qaratereń aýyly desek, sol týǵan topyraǵyna arnaǵan týyndysy sýretshiniń ózegin órteńge óngen gúldeı jaryp shyqqany aıdaı anyq. Oı men boıaýdy ushtastyra otyryp, qylqalamdy aq qaǵazdyń betine aparǵanda ádemi shyǵarmalar dúnıege kelipti. Jalpy, joǵary deńgeıdegi kásibı qylqalam sheberi Shynybaı shynaıy shabyt ıesi, sondaı-aq, klassıkalyq akademııalyq deńgeıge jetken sýretshi deýge bolady. Sheberdiń súıikti motıvi – týǵan jer tabıǵatynyń sulýlyǵyn kórsetý basty maqsaty ekenin joǵaryda aıttyq. Sol týyndylarynyń basty ereksheligi – tústerge óte baı, boıaýy qanyq shyǵyp, qarap turǵanda aıyzyńdy qandyrady.
Máskeýdegi Sýrıkov atyndaǵy kórkemsýret akademııasyn bitirgen sýretshiniń bul kórmesindegi týyndylardan qazaq jurtynyń búkil tynys-tirshiligi men mundalap turǵandaı. Kórmeniń ashylý saltanatynda qazaqtyń zııaly qaýym ókilderi Shynybaıdyń shymyr talantyna tánti bolýlarymen qatar, sýretteriniń tereń mazmunyn taldap, dán rızalyqtaryn bildirip jatty. Kórme sońynda Mádenıet salasynyń úzdigi Eýrazııa dızaınerler odaǵynyń medalimen marapattalǵanyn Ermek Asylhan jetkizdi.
Beken Qaıratuly,
«Egemen Qazaqstan»
Sýretterdi túsirgen
Erlan OMAROV,
«Egemen Qazaqstan»
