Eki jarym myń jyl burynǵy oqıǵany jańǵyrtyp, aty ańyzǵa aınalǵan tańǵajaıyp Tumardyń óz halqynyń bostandyǵy úshin kúresken erligi men áıelge tán mahabbatyn óner tilimen sóıletý ońaı sharýa emes. Mine, endi Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» AQ «Sataıfılm» kınostýdııasymen birlese otyryp, bıylǵy jyldyń eń iri jobasy – «Tumar» atty tarıhı jobanyń túsirilimin qolǵa alyp, daıyndyq jumystaryn bastap ta ketti.
Buǵan deıin «Reketır», «Adasqandar», «Lıkvıdator», «Jaýjúrek myń bala» atty fılmderdi sátti túsirip, «Anaǵa aparar jol» týyndysyn Álııa Nazarbaevamen birge shyǵarmashylyq birlikte júzege asyrǵan rejısser Aqan Sataevtyń «Tumar» týraly týyndysy taǵy da eki jaqty jaýapkershilikpen atqarylmaq.
– Bul aýqymdy jobanyń avtory – Álııa Nursultanqyzy. О́zderińizge belgili, «Anaǵa aparar jol» fılminde birlesip, tabysty jumys jasadyq. Endi, mine, men jáne meniń túsirý tobym asa qyzyǵýshylyqpen jáne úlken jaýapkershilikpen osy tarıhı jobaǵa kiriskeli otyrmyz. Búgingi kúni tarıhı materıaldarmen tanysyp, ssenarııdi jazý jáne taldaý, jobanyń óndirisin josparlaý, túsirý tobyn qurý, ǵalym-keńesshilerdi jobaǵa tartý, aldyn ala túsirilim lokasııalaryn tańdaý sııaqty daıyndyq jumystary júrgizilýde, – dedi Aqan Sataev.
Rejısser jaqyn kúnderi respýblıkalyq kastıng jarııalanatynyn habarlady. Fılm túsirilimi bastalmaı turyp, barlyq akterler qarý-jaraq asynyp, atqa jaıdaq minip, sadaq tartyp, soǵys ónerinen saýattaryn ashý úshin aldyn ala daıyndyqtan ótetin bolady. Fılm túsirý jumysy bıylǵy jyldyń qazan aıynda bastalyp, 2018 jyldyń aqpanyna deıin jalǵasady. Kınotýyndynyń ssenarııin jazýdy Álııa Nazarbaeva men Tımýr Jaqsylyqov qolǵa alǵan. Aıta ketsek, túsirý jumystaryna elimizdiń aldyńǵy qatardaǵy kıno mamandary qatysady, sonymen qatar, sheteldik mamandar, onyń ishinde skrıpt-doktor jáne kompıýterlik grafıka sheberleri jumyldyrylatyn bolady.
Aıgúl AHANBAIQYZY,
«Egemen Qazaqstan»
ALMATY
