Osy oraıda Qaraǵandy qalasynda bıylǵy jyldyń 7 sáýirinen bastap, 7 mamyr – Otan qorǵaýshylar merekesine deıin «Erlik» atty aılyq aksııa ótpek.
Atalmysh aksııa oblys ortalyǵyndaǵy Jeńis saıabaǵynda 1995 jyly 7 sáýirde tájik-aýǵan shekarasynda erlikpen qaza tapqan 17 jaýyngerge arnalǵan «Erlik kúni» mıtıngisinen bastaý alady.
Búgingi kúni Qazaqstan Respýblıkasy Ulttyq ulany «Ortalyq» óńirlik qolbasshylyǵynyń qolbasshysy, general-maıor Erkin Botaqanov «Ardagerler odaǵy» respýblıkalyq qoǵamdyq birlestiginiń Qaraǵandy fılıalymen ıyqtasa, erlikpen qaza tapqan batyrlarǵa arnalǵan obelısk ornatý jóninde Qaraǵandy qalasynyń ákimshiligine usynyspen shyǵyp otyr.
Tarıhtan biletinimizdeı, halyqaralyq kelisimge sáıkes, Ishki áskerdiń, ıaǵnı qazirgi Ulttyq ulannyń áskerı qyzmetshileri 1993 jyldyń maýsymynan 1999 jyldyń tamyzyna deıin tájik-aýǵan shekarasyn kúzetýge qatysty. Osy jyldary kezekti aýysym túri boıynsha 20 qurama rota qurylyp, 2 myńnan astam sarbaz ben sardar jaýyngerlik tapsyrmany oryndady. 1995 jyldyń 7 sáýirinde Pamır taýyndaǵy Pshıhavr shatqalynda bolǵan qarýly qaqtyǵys kezinde Ishki áskerdiń 17 jaýyngeri erlikpen qaza taýyp, 33-i jaralanǵan edi.
Bul surapyl shaıqasta qaraǵandylyq qaharman, Jańaarqa aýdany, Túgisken aýylynyń týmasy Erkebulan Maqajanov ta erlikpen qaza tapqan bolatyn. Erkebulan Maqajanovtyń óshpes erligin eskere otyryp, týǵan aýylynda kóshe ataýy berilip, oqyǵan mektebi men turǵan úıine memorıaldyq taqta ornatyldy.
Qazaqstan Respýblıkasy Joǵarǵy Keńesiniń 1993 jylǵy 15 sáýirdegi «Táýelsiz Memleketter Dostastyǵynyń tájik-aýǵan ýchaskesindegi shekarasyn qorǵaýdy kúsheıtý týraly» qaýlysyna sáıkes, jaýyngerlik mindetterin oryndaý kezinde óshpes erliktiń úlgisin kórsetken Ulttyq ulannyń áskerı qyzmetshileri týraly aıtý búgingi jas urpaq úshin de, erteńgi Otan qorǵaýshylar úshin de asa qajet is. Esil erlerge ornatylmaq belgi de on jeti oǵlandy eske salyp, bozdaqtarǵa taǵzym ıakı qurmet bolmaq. Árıne, eshkim de, eshqashan da umytylmaq emes. Buǵan deıin de Qazaqstan Respýblıkasy Ulttyq ulan bas qolbasshysy jáne Astana ákimdigi birlese otyryp, «Otan-Ana» monýmenti janynan erlikpen qaza tapqan 17 jaýyngerge Alleıa ashqan bolatyn, al 2014 jyly obelısk ornatyldy. Sonymen qosa, Qaraǵandy qalasynda ornalasqan Qazaqstan Respýblıkasy Ulttyq ulany «Ortalyq» óńirlik qolbasshylyǵynyń aýlasynda joǵaryda atalǵan 17 sarbazdyń esimderi altyn árippen jazylǵan «Jaýyngerlik Dańq» memorıaly ornatyldy.
Jalpy, 1992-2001 jyldary tájik-aýǵan shekarasy ýchaskesindegi TMD elderiniń shekarasyn kúzetýdegi jaýyngerlik áreketke 9 myńdaı áskerı qyzmetshi qatysypty. Shekarada qarýlanǵan toptarmen qaqtyǵys, zastavalarǵa ártúrli shabýylar, terrorlyq áreket jáne dıversııalardyń nátıjesinde barlyǵy 43 kazaqstandyq sarbaz qaıtys bolsa, 100-den astamy jaralandy.
Kenshiler astanasynda ótpek josparly ic-sharaǵa shahar bashylyǵy, máslıhat depýtattary, UQK shekara qyzmeti, Qorǵanys mınıstrliginiń «Astana» jáne Qazaqstan Ulttyq ulany «Ortalyq» óńirlik qolbasshylyqtarynyń ókilderi men bólimderiniń jeke quramdary, sonymen qosa, tájik-aýǵan, aýǵan soǵysynyń ardagerleri, patrıottyq klýb oqýshylary, oblystaǵy JOO stýdentteri, mektep oqýshylary qatyspaq.
Mıras ASAN,
«Egemen Qazaqstan»
QARAǴANDY
