Eki kúnge josparlanǵan aıtýly shara kórnekti ǵalymnyń eleýli eńbegin, ǵylym salasyndaǵy jańa baǵyttar men shyǵarmashyl jas ǵalymdardyń izdenisterin pash etýge baǵyttaldy. 39 jasynda irgeli oqý oshaǵyna jetekshilik etip, el tarıhyndaǵy eń jas rektor retinde tanylǵan qaıratkerdiń tom-tom kitapqa arqaý bolatyn ǵylymı izdenisteri, zerttep-zerdelegen ushan-teńiz eńbekteri men zertteý jumystary óz salasyndaǵy taptyrmas qundy ádebıetke aınaldy. Ábdiqappar Áshimov – respýblıkaǵa eńbegi sińgen kórnekti ǵylym qaıratkeri, tehnıka ǵylymdarynyń doktory, Qazaqstan Respýblıkasy Ǵylym akademııasynyń tolyq múshesi, professor, Bilim jáne ǵylym mınıstrligine qarasty Aqparattyq jáne basqarý máseleleri ınstıtýtynyń júıeli analız jáne basqarý zerthanasynyń meńgerýshisi. Elimizdiń ǵylym salasynyń kóshbasynda júrgen talaı-talaı azamattardy qanattandyrǵan ustaz. Ǵylym jolyndaǵy jetistikteri, shákirt tárbıeleýdegi erekshe yjdaqattylyǵy áriptesteri tarapynan keń kólemde aıtyldy.
«Ábdiqappar aǵa osy ýaqytqa deıin ǵylym jolynda shákirt tárbıeleýden qol úzbeı keledi. Ǵylymǵa kózqarasy óte joǵarǵy deńgeıde. Ýnıversıtetimizdi basqarǵan jyldary da qarqyndy eńbek etti. Elýden asa ǵylym kandıdattaryn, jıyrma shaqty ǵylym doktorlaryn daıyndap shyǵardy. Shákirtteri elimizge ǵana emes, syrt memleketterge de tanymal ǵalymdar. Ol kisiniń oqý ordamyzǵa ǵana emes, elimizdiń ǵylym salasyna etken eńbegin eskere kele osyndaı shara uıymdastyryp otyrmyz. Sharanyń negizgi maqsaty − aıtýly ǵalymǵa qurmet kórsetý, jas ǵalymdarymyzdy qanattandyrý. Búgingi konferensııa úsh seksııadan turady. Alǵashqy baǵyt − parametrli retteý, ekinshi seksııa − aǵamyzdyń makroekonomıkaǵa qatysty ǵylymı jumysyna negizdeldi. Al, úshinshi baǵyt − ınstıtýtymyzdyń negizin qalaýshy aqparattyq tehnologııalarmen matematıkalyq modeldeý seksııasy. Osy úsh seksııa boıynsha kóptegen jumystar qabyldandy. Polsha, Ýkraına, Kanada, Japonııa, Reseı, О́zbekstannan kelgen ǵalymdar qatysyp ǵylymı jańalyqtarymen bólisýde – deıdi Ábdiqappar Áshimov negizin qalaǵan «Aqparattyq tehnologııalar» kafedrasynyń meńgerýshisi Nurbek Saparhodjaev.
«Kishkentaıynan taǵdyrdyń taýqymetin tartyp, ata-anasynan erte aıyrylyp, býyny bekimegen balań shaǵynan aýyr eńbekke aralasqan Ábdiqappar, bir úlken romanǵa arqaý bolatyn azamat. О́z bilim-biligimen, adal eńbegimen osy abyroıǵa jetti. Únemi izdenis ústinde júredi. Bir isti bastasa oǵan jan-tánimen berilip, sońyna deıin jetkizbeı tynbaıdy. Adaldyq pen jaýapkershilikti ustanyp keledi. Otbasyna da ýaqyt taba biledi», – deıdi ǵalymnyń jary Baqytjan Aısaqova. Sondaı-aq, konferensııa barysynda qazaqstandyq jáne sheteldik jetekshi ýnıversıtetterdiń akademıkteri men professorlary jas ǵalymdardyń ǵylymı-zertteý jumystarymen tanysty. Sharanyń qorytyndy kúni kórnekti-geolog ǵalym Qanysh Sátbaevtyń týǵan kúnine tuspa-tus kelýine oraı jıynǵa qatysýshy barlyq qonaqtar ǵalymnyń eskertkishine dástúrli túrde gúl shoqtaryn qoıdy.
Arman OKTIаBR,
«Egemen Qazaqstan»
ALMATY
