– Jyl saıyn ótkizilip turatyn kórmege reseılikter belsendi atsalysady, al ózimizdiń Qazaqstannyń da ár oblysynda ıt asyraıtyndar jetkilikti, biraq osyndaı basqosýlarǵa olar kele bermeıdi. Bul joly jergilikti Qostanaı men Rýdnyı qalalaryndaǵy áýesqoılardyń qatysýyn aıtpaǵanda, Astanadan 4 ıt, Kókshetaýdan 3 ıt kórmege qatysyp otyr, – deıdi kórmeni uıymdastyrǵan «Kanıs-Profı» ıtterdiń asyl tuqymyn ósirý jáne úıretý ortalyǵynyń kınology Iýlııa Golskaıa.
Kúni boıy ótken kórmege kelýshiler Reseıden kelgen ıttiń «samoedy», Kókshetaýdan kelgen «malamýt» tuqymdaryn erekshe qyzyqtady. «Samoedy» ıtiniń júni appaq túbit sekildi úlpildep turady, kádimgi balalardyń jumsaq oıynshyǵyna óte uqsaıdy, sondaı súıkimdiligimen birden kózge tústi. Al kókshetaýlyq «malamýt» kádimgi túz taǵysy bórini eske salady eken. Kórmeni qyzyqtaı kelgen er balalar sony aınalshyqtaýmen boldy.
Kórmege qatysqan ıtterdi Almatydan arnaıy shaqyrtylǵan halyqaralyq dárejedegi sarapshy Mark Zatýrınskıı saraptady. It ósirý áýesqoılarynyń, kórermenderdiń túrli pikiri de esepke alyndy. Qoryta kele, kórmeniń tórine «nemis ovcharkasy» shyqty. Ekinshi oryndy «Orta Azııa ovcharkasy», úshinshi oryndy «Akıta» degen japondyq tuqym aldy.
Aıtpaqshy, osy joly «Kanıs-Profı» ıtterdiń asyl tuqymyn ósirý jáne úıretý ortalyǵy «Orta Azııa ovcharkasy» ıtteriniń kórmesin jeke ótkizdi. Oǵan Reseı men Qazaqstannan 20 ıt qatysty. Júldeli oryn reseılikterdiń jeteginde ketti.
Názıra JÁRIMBETOVA,
«Egemen Qazaqstan»
QOSTANAI
