Elbasy Nursultan Nazarbaevtyń birneshe jyl burynǵy Joldaýynda bul taqyryp naqty atap kórsetilgen. Bizdiń oıymyzsha, bul – durys qadam ári elimiz úshin údemeli ilgerileýshiliktiń qadamy.
Qalaı desek te, belgili bir ótpeli kezeń qajet bolatynyn, tıisti qıyndyqtar týyndaýy múmkin ekenin túsinýimiz qajet. Osy turǵyda halyqty daıarlaýǵa, túsindirý jumystaryn júrgizýge qajetti ǵylymı jumystarǵa baılanysty sharalar qamtylatyny anyq. Strategııalyq basym maqsattar turǵysynan alǵanda, bizdiń latyn álipbıine kóshýimiz elimiz úshin durys qadam dep paıymdaımyn. Sebebi, ol bizdiń memlekettiń ulttyq múddesine saı keledi.
Búginde ekonomıkalyq ahýal turaqtalyp kele jatqandyqtan, konstıtýsııalyq reformadan soń, Qazaqstannyń uzaq merzimdi múddelerin qamtamasyz etýge baǵyttalǵan qandaı da bir strategııalyq qadamdardy iske asyrý qajet. Sonymen qatar, zańnamalyq baǵytta mańyzdy jumystardan keıin Memleket basshysy osyndaı bastamany jarııalady. Bul sheshimdi, árıne, qoldaımyz.
Al latynǵa kóshý sharalary kezeń-kezeńmen júrýi tıis. Osy oraıda, memlekettik organdar bul baǵyttaǵy prosesti laıyqty deńgeıde, ıaǵnı josparly negizde iske asyrýy qajet. Atap aıtqanda, alda atqarylatyn sharalar aıasynda Úkimet saýatty baǵdarlamany qurýy tıis. Túsindirý jumystaryn, keńesterdi baıyppen júrgizý kerek. Osydan keıin birtindep latyn álipbıine kóshirýdi iske asyrýǵa bolady.
Memleket basshysy Nursultan Nazarbaev «Egemen Qazaqstan» gazetine shyqqan maqalasynda latyn álipbıine kóshýdiń naqty kestesin ázirleýdi tapsyrǵan bolatyn. Elbasy 2017 jyldyń aıaǵyna deıin ǵalymdardyń kómegimen, barsha qoǵam ókilderimen aqyldasa otyryp, qazaq álipbıiniń jańa grafıkadaǵy biryńǵaı standartty nusqasyn qabyldaý kerektigin de jetkizdi. Al 2018 jyldan bastap jańa álipbıdi úıretetin mamandardy jáne orta mektepterge arnalǵan oqýlyqtardy daıyndaýǵa kirisken durys degeni quptarlyq is.
Máýlen ÁShIMBAEV,
Parlament Májilisiniń depýtaty
