Konferensııanyń kún tártibine partııanyń oblystyq fılıalynyń tóraǵasyn saılaý jáne Elbasynyń «Egemen Qazaqstan» gazetinde jarııalanǵan «Bolashaqqa baǵdar: rýhanı jańǵyrý» atty baǵdarlamalyq maqalasyn talqylap, qoldaý týraly máseleler engizildi. Kún tártibindegi birinshi másele boıynsha delegattardyń biraýyzdan daýys berýimen oblys ákimi Málik Myrzalın «Nur Otan» partııasy Aqmola oblystyq fılıalynyń tóraǵasy bolyp saılandy.
Budan keıin Málik Myrzalın Qazaqstan Respýblıkasynyń Prezıdenti Nursultan Nazarbaevtyń «Bolashaqqa baǵdar: rýhanı jańǵyrý» atty maqalasyna keńinen toqtalyp, onyń mazmuny, ózektiligi men tarıhı mán-mańyzy týraly jan-jaqty sóz sóıledi.
– Bul maqalada qarastyrylǵan básekege qabilettilik máselesi óte oryndy jáne kókeıkesti bolyp tabylady. Osy oraıda, Memleket basshysy «Qazaqstannyń Úshinshi jańǵyrýy: jahandyq básekege qabilettilik» atty el halqyna arnaǵan bıylǵy Joldaýynda álemniń ozyq otyz eliniń qataryna qosylý mindetin qoıǵany belgili. Maqalada qozǵalǵan keleli máseleler men irgeli mindetterdi osy jańǵyrýymyzdyń jolyndaǵy basty baǵyt-baǵdar dep túsingen jón. Latyn álipbıine kóshý – zaman talaby. Árıne, ol úshin eń aldymen, bolashaq urpaqty osy álipbımen oqytatyn mamandardy daıarlap alýymyz kerek. Búgingi jas urpaq alǵyr da yntaly bolyp ósip keledi. Qazir balabaqshalardyń ózinde búldirshinder úsh tildi úırenip jatyr. Sondyqtan, bizge latyn álipbıin meńgerý qıynǵa soqpaıdy. Osynyń nátıjesinde Internet jelilerindegi basqa elderdiń baǵdarlamalary men jańalyqtaryn oqyp, óz qajetimizge erkin paıdalana alatyn bolamyz. Osylaı ózge ozyq eldermen ıyq tirestirýge múmkinshiligimiz arta túsedi, – dedi aımaq basshysy óz sózinde.
Sondaı-aq, konferensııada «Nur Otan» partııasynyń Jaqsy aýdandyq fılıaly tóraǵasynyń birinshi orynbasary Kamıla Muǵalova, Aqmola oblysy boıynsha «Azamattyq alıansy qaýymdastyǵy» birlestiginiń tóraıymy Irına Terenteva, oblystyq «Arqa ajary» gazetiniń bas redaktory Qaıyrbaı Tóreǵoja sóz sóılep, Elbasynyń baǵdarlamalyq maqalasyna baılanysty óz oı-pikirlerin bildirdi.
Yrysaldy ShAMShIEVA
Aqmola oblysy
