Jıynǵa tóraǵalyq etken aımaq basshysy Erlan Qoshanov alǵy sózinde: – Oblystyń mıllıondaǵan jurtshylyǵy, árbir turǵyny – Prezıdenttiń barlyq strategııalyq bastamalaryn júzege asyrýdaǵy tiregi ekenin erekshe sezinedi. Sondyqtan biz jedel aktıv jınalysyn shaqyryp, halyqqa, jergilikti bılikke, buqaraǵa – Elbasymyz Nursultan Ábishuly Nazarbaevtyń «Bolashaqqa baǵdar: rýhanı jańǵyrý» atty maqalasynyń mańyzyn túsindirý úshin jınaldyq. Búgin jarııalanǵan maqala – Elbasynyń «Qazaqstannyń Úshinshi jańǵyrýy» Joldaýymen úndestik taýyp, bizdiń aldymyzda rýhanı damý, jahandyq jańǵyrý jolynda úlken ári tarıhı mindetter qoıyp otyr, – dedi.
Alǵashqy sózdi Qazaqstan jazýshylar Odaǵynyń Qaraǵandy oblystyq fılıalynyń dırektory, belgili aqyn Serik Aqsuńqaruly sóıledi. – Elbasy bul maqalasy arqyly dúnıe júzindegi eń damyǵan otyz eldiń qataryna qosylýǵa umtylǵan qazaqtyń sóz qoldanysyna «ulttyq sana» degen tirkesti engizdi. Úsh júz jyldyq bodandyq etimizden ótip súıegimizge jetken tusta er Mahambet pen muzart Muqaǵalıdyń rýhy arqamyzǵa qaıta qonǵandaı boldy. Bul maqala iri oqıǵalardyń bastaýy bolady áli, – dedi.
Sonymen qatar, E.Bóketov atyndaǵy Qaraǵandy memlekettik ýnıversıtetiniń saıasattaný jáne áleýmettaný kafedrasynyń meńgerýshisi, saıası ǵylymdar kandıdaty, dosent Dastan Kósherbaev óz oıyn ortaǵa salyp, maqalada kórsetilgen ár reformaǵa baılanysty pikir bildirdi.
Atalmysh basqosýdan qaraǵandylyq belsendi jastar da qalys qalǵan joq. Qaraǵandy oblysy jastar resýrstyq ortalyǵynyń aqparatty qamtamasyz etý jáne áleýmettik tehnologııa bóliminiń basshysy Erjan Hamıtov minberge shyǵyp: – Elbasy atap aıtqandaı: memleket pen ult quryshtan quıylyp, qatyp qalǵan dúnıe emes, únemi damyp otyratyn tiri aǵza ispetti. Maqaladaǵy «Jańa jaǵdaıda jańǵyrýǵa degen ishki umtylys – bizdiń damýymyzdyń eń basty qaǵıdasy. О́mir súrý úshin ózgere bilý kerek. Oǵan kónbegender tarıhtyń shańyna kómilip qala beredi» degen sóz – dál jaǵdaıdy dóp basqan qoǵam dıagnozy. Qaraǵandy oblysynyń árbir turǵyny jańǵyrý prosesine óz úlesin qosýǵa daıyn degen senimdemin, – dep jınalǵan qaýymdy jigerlendire jalyndy sóz aıtty.
Baıandama jasaýshylardyń qatarynda oblystyq máslıhattyń depýtattary, Qazaqstan halqy Assambleıasynyń ókilderi de boldy. Qaısysy bolsyn, búgingi kúnniń basty nazaryndaǵy mańyzdy máseleni jan-jaqty talqylaýda ishki oılaryn irkip qalmady.
«Máńgilik El» ıdeıasynyń mazmunyn jan-jaqty aıqyndaı túsken bul maqala shyn máninde el damýynyń rýhanı baǵytyndaǵy basty temirqazyq bolýy shart.
Bul keleli keńestiń qorytyndy ortaq pikiri boldy.
Mıras ASAN,
«Egemen Qazaqstan»
Qaraǵandy oblysy
