«Fleshmobqa ýnıversıtetimizdegi barlyq fakýltetterdiń stýdentteri qatysýda. Olar Dımashqa osylaısha ózderiniń tilekterin bildirip, qoldaý kórsetkisi keledi. Dımashqa tabys tileımiz. Qazaqstannyń atyn álem sahnalarynda tanyta berýine tilektespiz", dedi Qazaq ulttyq óner ýnıversıtetiniń prorektory Turar Álipbaev.
Fleshmob barysynda jýrnalısterdiń suraǵyna jaýap bergen Maıra Ilııasova Dımashty Qazaqstanda baǵalamady degen pikirmen kelispeıtinin aıtty.
"Qytaıda halyq kóp. Sheshýshi kezeńde ne bolatynyn naqty boljap aıta almaımyn. Degenmen, Dımash konkýrsqa qatysqan birinshi kúnnen bastap ózin kórsetip, búkil álemdi baǵyndyrdy. Dımashtyń Qytaıda tanylǵanyna jarnamanyń myqtylyǵy da áser etti deýge bolady. Al Qazaqstanda biz buǵan deıin de Dımashtyń ónerine tánti bolyp, ony túrli konsertterge qatystyryp júrdik. Birneshe jyl buryn Dımash jas bolǵanyn da eskerý kerek. Osy ýaqytqa deıin ol óz-ózin damytty. Árıne, syn pikirlerdi de estidim. Biraq, ánshini ánshi, tilshini tilshi synaǵany durys dep oılaımyn", dedi Qazaqstannyń halyq ártisi Maıra Ilııasova.
Esterińizge sala ketsek, Dımash Qudaıbergen 15 sáýir kúni I am a singer konkýrsynyń fınalyna qatysady. Sheshýshi saıys tikeleı efırden kórsetilip, jeńimpazdy sol jerde otyrǵan kórermen anyqtaıdy.
Gúlnur Qýanyshbekqyzy,
"Egemen Qazaqstan"
Sýretterdi túsirgen Orynbaı Balmurat,
"Egemen Qazaqstan"
