«Chehııa quramasymen ótken sheshýshi oıyn óte aýyr boldy. Olardyń álem, Eýropa chempıonattarynda tájirıbesi kóbirek. Birinshi oryndy kózdep kelgenderi anyq», – dedi qaqpashy.
Irikteý kezeńinde Qazaqstan quramasy úsh oıyn ótkizip, óz qaqpasyna gol ótkizbedi.
«Bul jalǵyz meniń eńbegim emes, sondaı-aq, qarsylastarymyzdyń osaldyǵy dep te aıta almaımyn. Bul qorǵanysymyzdyń myqtylyǵynan. Alesıonyń qajet oıynshylardy iriktep alyp, yńǵaıly taktıkany qoldanǵanynyń arqasy. Sonymen qatar, qaqpashylarǵa jaýapty bapkerimiz Garotteniń de bul nátıjege tıgizgen paıdasy zor.
Al jalpy aıtar bolsaq, árbir qaqpashynyń basty mindeti – gol ótkizip almaý. Alǵashynda qaqpamyzǵa dop ótkizbeý kerek degen naqty josparymyz bolǵan emes. Men tek soqqylardyń bárin qaıtarǵym keledi. Áriptesterim de «nólge» oınaýdy jón kóredi», – dedi Igıta.
Bıyl qańtar aıynda ulttyq quramanyń bas bapkeri Kakaý qyzmetinen ketip, ornyna Joze Alesıo Da Sılva keldi. Igıtanyń aıtýynsha, ol Kakaýdyń stılin damytyp, óziniń de ıdeıalaryn qosypty. Sol sebepti Alesıonyń qol astynda Qazaqstan quramasy jaqsy nátıje kórsetip júr.
«Kakaý ylǵı da qasymyzda. Alesıoǵa jıi kómektesip turady. Ol match kezinde bizben birge qosalqy quramda otyrmasa da, Alesıomen jıi habarlasyp turatynyn bilemin. Árqaısysynyń ózindik ıdeıasy bar. Kakaý da bizdiń jetistikterimizge úlken úles qosqanyn umytpaǵanymyz jón», – dedi Leonardo de Melo Vıeıra Leıte.
Qaqpashy Slovenııada ótetin Eýropa chempıonaty, alǵa qoıǵan maqsattary jaıly da pikir bildirdi.
«Árbir jańa oıynymyzda deńgeıimizdi arttyrýymyz kerek. Qazirgi qalpymyzda toqtap qalýǵa bolmaıdy. Slovenııaǵa biz qazirgiden de kúshti bolyp baramyz dep oılaımyn. Eýropa chempıonatynda qarsylastarymyz ońaı bolmasy anyq. Biz ol jaqta fýtzalymyzdyń deńgeıi joǵary ekenin taǵy bir márte kórsetýimiz kerek.
Qandaı orynǵa ıe bolatynymyzdy qazir aıtý qıyndaý. Biraq qolymyzdan kelgenniń bárin jasaımyz. Aldymen, pleı-offqa shyǵýdy oılaýymyz kerek, keıinnen shırek fınalǵa, ári qaraı jartylaı fınal, fınal úshin talasatyn bolamyz. Mundaı jarysta qatelik jiberýge bolmaıdy. Árbir oıyn fınalǵa para-par. Sondyqtan bastapqy matchtan-aq jeńisti oılaýymyz kerek», – dedi Qazaqstan ulttyq quramasynyń qaqpashysy.
Quramanyń nátıjesi týraly bas bapker Joze Alesıo Da Sılva da pikir bildirdi.
«Men birneshe gol soǵyp, sondaı-aq ózime gol ótkizip alǵannan nebári 1:0 esebimen jeńgendi jón kóremin. Osyǵan deıin qorǵaýshy bolǵandyqtan ustanymym – gol jibermeý. Basty artyqshylyǵym mine, osy. Týrnır kezinde gol ótkizip almaý úshin jigitterdi jigerlendirip otyrdym. Komanda bul oıymdy júzege asyra bildi. Endi qarsylastarymyz bizden burynǵydan da qattyraq jasqanatyn bolady. Qorǵanysymyzdy buzyp ótý joldaryna erekshe mán beredi dep oılaımyn», – bas bapker.
Esterińizge sala keteıik, irikteý kezeńniń oıyndary Almaty qalasynda ótti. Qazaqstan quramasy alǵashqy oıynynda Makedonııamen kezdesip, 3:0 esebimen jeńdi. Goldardyń avtorlary: Leo 13, Serik Jamanqulov 19, Albert Aqbalyqov 33.
Sonymen qatar, Danııa quramasyn 5:0 etip utty. Goldardyń avtorlary: Serik Jamanqulov 4, Leo 9, Mıhaıl Pershın 17, Dýglas 17, Dinmuhambet Súleımenov 40.
Al sheshýshi oıynda Chehııamen kúsh synasyp, 3:0 esebimen basym tústi. Goldardyń avtorlary: Dýglas 5, Mıhaıl Pershın 20, Dýglas 38.
Aıta keterligi, Qazaqstan quramasynan bólek irikteý oıyndarynda Eýropanyń vıse-chempıony Reseı quramasy da óz qaqpasyn goldan aman saqtap qaldy.
Eýro-2018 chempıonaty kelesi jyly 30 qańtar men 10 aqpan aralyǵynda Lıýblıana (Slovenııa) qalasynda ótedi.
