Qytaıdyń Weibo áleýmettik jelisindegi aqparattarǵa sensek, 12 sáýir kúngi daıyndyq barysynda Dımash ózimen birge án shyrqaıtyn qytaılyq áriptesi Shań Venjemen Maıkl Djeksonnyń «Dangerous» sııaqty álemdik hıtke aınalǵan birneshe ánderin qosa shyrqaǵan.
Aıta keteıik, baıqaýdy uıymdastyryp otyrǵan Hýnan telearnasynyń bas ǵımaratyna ánshilerdiń úlken sýretteri ilinip, aqtyq básekege qyzý daıyndyq júrip jatyr.
Eske sala keteıik, Dımash «Singer» baıqaýyndaǵy erekshe talantymen kózge túsip, Qytaıda erekshe tanymaldylyqqa ıe boldy. Jas talant 23 naýryz kúni Shańhaı qalasynda 24-kezekti «China Top music Awards» sharasynyń «Azııanyń eń tanymal ánshisi» (Best Asia popularsinger) nomınasııasy boıynsha, 9 sáýir kúni Shenchjen qalasynda ótken «17th Top China Music Awards» sharasynda «Halyqaralyq dárejedegi tanymal ánshi» nomınasııasy boıynsha marapattaldy.
Bul sharada Dımashtyń áriptesi jáne BGTalent (黑金经纪) prodıýserlik kompanııasynyń negizin qalaýshy Shań Venje «Jyldyń eń úzdik áıel ánshisi» atanǵan bolatyn.
