– Bul baǵdarlamanyń máni – Qazaqstannyń rýhanı órkendeýi, álemdegi toqtaýsyz ózgerister, qubylystar úderisinde, jahandaný jaǵdaıynda óziniń ulttyq ereksheligin, rýhanı áleýetin joǵaltpaıtyn el retinde damýynda, táýelsiz el halqynyń táýelsiz qoǵamdyq sanasyn qalyptastyrýda. Memleket basshysy osyndaı aýqymdy maqsatty júzege asyrýdyń basym baǵyttaryn anyqtap berdi, – dedi oblys ákimi Nurlan Noǵaev.
«Elbasy maqalasynda kórsetilgen basty baǵyttardy júzege asyrý úshin munaıly aımaqta múmkindik mol. Atyraýdyń basty baılyǵy – munaı men gaz emes, jergilikti halqy, adamdary. Solardyń árqaısysy óz isiniń sheberi bolýy tıis. Jańa tehnologııalar, kompıýterlik saýattylyq, shet tilderin bilý – osyǵan qol jetkizýdiń quraly. Bul – tek kásibı talap emes, azamattyq paryz. Árbir azamat óziniń isine, otbasylyq jaǵdaıyna aldymen ózi jaýapty. Osyny halyq sanasyna sińirýimiz qajet. Qolda bar múmkindikterdi paıdalana otyryp, basymdyqtarymyzdy aıqyndap, jumystanýymyz kerek. Bul – jalpy qoǵam emes, árbir adamǵa qatysty másele. Barlyǵyna birdeı ǵalym bolý nemese sheteldik kompanııada menedjer bolý mindet emes. Árkim qolynan ne keledi, sonymen shuǵyldanýy kerek. Fermer de, ınjener de, dáriger de, dánekerleýshi de jaqsy maman bolsa ǵana jurtqa qadirli – osyny, aldymen, jastardyń sanasyna quıaıyq», dep atap ótti aımaq basshysy.
Qaı zamanda da adamzattyń basty qarýy – bilim. «Bolashaq» baǵdarlamasy boıynsha 300-den astam atyraýlyq jas shet elderde bilim aldy. Qazir olar elimizdiń túkpir-túkpirinde tabysty eńbek etip júr. Oblys ákimi oqý oryndarynda mamandyq tańdaýda jastardyń, ata-analardyń sanasynda «prestıj» degen uǵymdy «tıimdi», «bolashaǵy bar» degen uǵymdar almastyrýy qajet ekenin de aıtty.
– Nege keńes kezinde bizden ozyq bolǵan respýblıkalardy búgin artta qaldyrdyq? Árıne, aldymen bul – Elbasynyń kóregen saıasatynyń, halyqtyń eńbeginiń nátıjesi. Sonymen qatar, álemge ashyq bolýymyzdyń, ártúrli úrdisterge beıim bolýymyzdyń mańyzy zor. Oblysymyzda osy baǵytta júıeli jumystar bar. О́tken jyly oblys ákimi apparatynyń memlekettik qyzmetshilerdiń biliktiligin arttyrý, qaıta daıarlaý jáne tilderdi oqytý óńirlik ortalyǵynda 271 adam – qazaq, 37 adam – orys, 83 adam aǵylshyn tilderiniń kýrstarynan ótti. Atyraýda halyqtyń qazaq tilin meńgerý deńgeıi joǵary: áleýmettik zertteýler qorytyndysymen 96,9 paıyz degen málimet alynyp otyr. Aǵylshyn tilin meńgergenderdiń úlesi – 12,5 paıyz, al orys tilin meńgergenderdiń úlesi 90,1 paıyz, – dep oblys ákimi Nurlan Noǵaev naqty derekter keltirdi.
Oblystyq bilim berý basqarmasy ádistemelik kabınetiniń dırektory, PhD doktory Ǵabıt Qabekenov aǵylshyn tilin meńgerý básekelik qabilettiń alǵysharttarynyń birine aınalyp otyrǵanyna toqtaldy. 2019 jyldan bastap 10-11 synyptarda fızıka, hımııa, bıologııa, ınformatıka pánderi aǵylshyn tilinde oqytylýyna baılanysty, osy pánderden sabaq beretin 102 pedagog aǵylshyn tilinde oqytý kýrsynda biliktilikterin arttyrǵan. Bıyl atalǵan kýrstan 214 muǵalimdi ótkizý josparlanyp otyr.
Elbasy barsha qazaqstandyqtardy HHI ǵasyrdyń talaptaryna saı daıarlaýda «Sıfrly Qazaqstan» baǵdarlamasynyń mańyzdylyǵyna erekshe toqtalǵan. Aqparattyq tehnologııalar salasyndaǵy jedeldetilgen jańǵyrtýlardy paıdalanýda oblystyń 178 mektebi «Bilimland.kz» ınnovasııalyq bilim berýdiń onlaın resýrsyna qosylsa, 134 mekteptiń negizgi sýbektileri arasyndaǵy baılanysty nyǵaıtý maqsatynda «Kúndelik» qanatqaqty jobasy engizildi. Bul mektep baǵdarlamasy boıynsha jasalǵan on myńǵa jýyq ınteraktıvti sabaqqa jol ashady. Myńdaǵan kórneki qural usynady, jaratylystaný pánderi boıynsha álemdegi eń úzdik vırtýaldy zerthanany paıdalanýǵa múmkindik beredi.
Oblystyq tarıhı-ólketaný murajaıynyń basshysy Rashıda Harıpova mádenı muralarymyzdyń jańa ǵasyrmen birge jańǵyrýyna Elbasy erekshe kóńil bólip kele jatqanyn aıtty. «Saraıshyq, Aqtóbe-Laetı sekildi kóne shaharlar, Taskeshý kerýen saraıy zerttelip jatyr. Saraıshyq irgesin bekitý jumystary men qala ornynda qazba jumystaryn júrgizý, tabylǵan qundy jádigerler negizinde mýzeı ǵımaratyn keńeıtý, aspan asty mýzeıin ashý – Elbasy maqalasyndaǵy el ıgiligi úshin isteletin basty sharalardyń bastamasy. Elbasy maqalasyndaǵy el úshin eńbek etken tarıhı tulǵalarymyzdyń esimderin el jadynda jańǵyrtý, keıingi urpaq jadynda máńgi qaldyrý ıdeıasy bizdiń óńirde dástúrli túrde atqarylyp keledi», dedi ol.
Aktıv jıynyn qorytyndylaǵan oblys ákimi Prezıdent maqalasynda júktelgen mindetterdi iske asyrý úshin jergilikti memlekettik organdarǵa naqty tapsyrmalar berdi.
Baqytgúl BABASh,
«Egemen Qazaqstan»
ATYRAÝ
