Alqaly basqosýdy ýnıversıtettiń rektory Serik О́mirbaev kirispe sózben ashyp, birinshi sózdi aımaq basshysy Qumar Aqsaqalovqa berdi. Qumar Irgebaıuly HHI ǵasyrdaǵy ulttyq sananyń jańa turpatty qaǵıdattaryn jan-jaqty saraptap bergen baǵdarlamalyq maqalanyń mańyzdylyǵyn, ýaqyt talabymen úndestigin, máselelerdiń ótkir qoıylyp, naqty mindetter belgilenýimen erekshelenetinin atap kórsetti. Tabysty ótken eki jańǵyrý arqyly Qazaqstan óziniń damý jolymen alǵa qaraı qaryshty qadam basyp keledi. Elbasy halyqqa arnaǵan bıylǵy Joldaýynda Úshinshi jańǵyrýdyń basym bes baǵytyn belgilep, jahandyq syn-qaterlermen kúres josparyn quryp berdi. Memleket basshysy taıaýda jarııalanǵan «Bolashaqqa baǵdar: rýhanı jańǵyrý»» maqalasynda «alǵy maqsattarǵa jetý úshin bizdiń sanamyz isimizden ozyp júrýi, ıaǵnı odan buryn jańǵyryp otyrýy» tıistiligine el nazaryn aýdaryp, sonda ǵana» saıası jáne ekonomıkalyq baǵdarlamalardy tolyqtyryp qana qoımaı, olardyń ózegine aınalatynyn» dáıektep berdi, deı kelip, shırek ǵasyr bederinde elimizde rýhanı salaǵa qatysty aýqymdy da irgeli jumystar atqarylǵanyn, «Mádenı mura», «Halyq – tarıh tolqynynda», taǵy basqa irgeli baǵdarlamalardyń iske asyrylǵanyn, osy joly usynylyp otyrǵan aýqymdy baǵdarlama búgingi zaman bolmysy men qalybyna saı keletinin, úndesetinin, tyń úlgidegi jańǵyrýlarǵa bastaıtynyn tilge tıek etti. Maqaladan «Jańa turpatty jańǵyrýdyń eń basty sharty – sol ulttyq kodyńdy saqtaı bilý. Onsyz jańǵyrý degenińizdiń qur jańǵyryqqa aınalýy op-ońaı» degen úzindiler keltirip, zaman synynan súrinbeı ótip, búgingi kúni jarasymdy sabaqtastyq dińi sanalatyn ozyq dástúrlerdi, tamyry tereńnen bastaý alatyn tarıhymyzdy baıytý, ıgerý, basqa halyqtar men órkenıetterdiń erekshelikterin eskerý arqyly árbir qazaqstandyq, sol arqyly ár tutas ult HHI ǵasyrǵa laıyq qasıetterdi meńgeredi. О́ıtkeni, básekelestik qarym-qabiletti jahandyq dáýir talaptarymen úndestirý faktorlary arasynda rýhanı jańǵyrýdyń róli aıryqsha.
Maqalany talqylaý jıynynda sóz alǵan SQMÝ-diń professory Zarqyn Taıshybaı, oblystyq kúrd etnomádenı ortalyǵynyń tóraǵasy Rashıd Nadırov, Nazarbaev zııatkerlik mektebiniń muǵalimi Dilbar Begalına, «Best» gımnazııasynyń dırektory Nadejda Zaıchenko, M.Jumabaev atyndaǵy gýmanıtarlyq kolledjdiń stýdenti Áıgerim Ǵabbas baǵaly usynystar men ómirsheń ıdeıalardy qýattap, aıqyn, túsinikti, keleshekke kóz tikken baǵdarlamanyń negizgi kilti, basty temirqazyǵy buqaralyq sana-sezimdi jahandyq álemge kiriktirý, úılesimdi etý, bylaısha aıtqanda, tórtkúl dúnıe jańalyqtaryn jete seziný, jańa tehnologııa ózgeristerine daıyn bolý, ozyq tájirıbelerdi qabyldaý múmkindikterin tolyqqandy ıelený ekenin alǵa tartty.
Jasyratyny joq, qanymyzǵa sińgen keıbir eski daǵdylardan aıyryla almaı júrgenimiz jaıly jerine jetkize aıtylyp ta, jazylyp ta júr. Osy bir osal tusymyzdy Elbasy dóp basyp, jurtshylyqty jaǵymdy minez-qulyq pragmatızmine úndeı otyryp, babalarymyzdan qalǵan izgi qasıetterdi túletýge, naqty maqsatqa jetýge, bilim alýǵa, salamatty ómir saltyn ustanýǵa, kásibı turǵydan jetilýge basymdyq berýge shaqyrady. Mine, jas quraqtaı jelkildeı ósip kele jatqan óskeleń urpaq tárbıesinde bul jaıttar aıryqsha oryn alary daýsyz. Sonymen qatar, «Ulttyq biregeılikti saqtaý», «Bilimniń saltanat qurýy», «Sananyń ashyqtyǵy» taraýlary boıynsha da tushymdy áńgime qozǵalyp, taıaý jyldardaǵy mindetterge, atap aıtqanda, qazaq tilin latyn álipbıine kóshirý, «Týǵan jer», «Qazaqstandaǵy 100 jańa esim», taǵy basqa máseleler negizgi taqyryp arqaýyna aınaldy.
Alqaly jıynǵa qatysýshylar Elbasynyń rýhanı jańǵyrý jónindegi baǵaly usynystaryn qazaqstandyqtarǵa, onyń ishinde jas urpaq zerdesine jetkizý joldaryn ortaǵa saldy.
О́mir ESQALI,
«Egemen Qazaqstan»
Soltústik Qazaqstan oblysy
