Muny aıtyp otyrǵan sebebimiz, bul úshin eń aldymen qurylys jumystary keńinen qarqyn alyp, qanat jaımaq. Búgingi zamanǵy qala qurylysy óte kúrdeli, ári jan-jaqty oılastyrylǵan sapaly da sándi sáýlettik sheshimderdi talap etedi. Áıtse de oblysta bas sáýletshi shtaty men qyzmeti qarastyrylmaǵan. Osyndaı kereǵarlyq jóninde oblys ákimdigi janyndaǵy qala qurylysy keńesiniń májilisinde ashyq aıtyldy.
Gáp mynada deýge bolady. Buǵan deıingi jyldarda elimizdiń barlyq derlik oblystarynda sáýlet jáne qala qurylysy qurylymy derbes basqarma, bólek vedomstvo retinde is-qımyl tanytyp keldi. Alaıda, keıingi eki-úsh jyldyń bederinde óńirlerdegi sáýlet basqarmalary qysqartyldy da, qurylys basqarmasynyń quramyna qosyldy. Árıne, mundaı ózgerispen ońtaılandyrýdyń ózi bıýdjet qarajattaryn únemdeý men tıimdi túrde jumsaý qajettiliginen týyndaǵany talassyz.
Osy yńǵaımen qarastyrǵanda qazirgi jaǵdaıda oblystyń bas sáýletshisi dep júrgenimiz – Aqtóbe oblystyq qurylys, sáýlet jáne qala qurylysy basqarmasynyń basshysy Serik Tólenbergenovtiń orynbasary bolyp tabylady eken. Ári munyń ózi naqty mártebesi aıqyndalmaǵan, bardyń da qatarynan kórinbeıtin, joqtyń sanatynan kezdespeıtin qyzmet bolyp shyqpaı ma?
Árıne, qoǵamdyq ómir ne nársege bolsa da óziniń ózgerisin engizbeı tura almaıdy. Barlyq óńirde birizdilik bolýy shart pa eken?! Degenmen, Aqtóbe sekildi jyl saıyn qulashyn keńge jaıyp, ósip-órkendep, jedel qarqynmen damyp kele jatqan óńirde buǵan deıingi sáýlet jáne qala qurylysy sekildi basqarý qurylymyn qaıtadan ornyqtyrǵan jón sekildi. Qalaı desek te, aglomerasııalyq aımaqta qaıta qalpyna kelgen qurylymnan tıisti qaıtarym bolary anyq.
Temir QUSAIYN,
«Egemen Qazaqstan»
Aqtóbe oblysy
