Altynshy týrdaǵy aıshyqty jeńis Pavlodarda tý tikti. Jergilikti «Ertis» klýby «Taraz» komandasyn tas-talqan etip utty da, týrnır kestesinde jeke-dara kósh bastady. Bul matchta jeti gol soǵyldy: onyń beseýi – pavlodarlyqtardyń enshisinde.
Kúnnen-kúnge el chempıony «Astananyń» qarqyny údep keledi. Elordalyq klýb osymen qatarynan tórtinshi jeńisine qol jetkizip, «Ertisten» keıingi ekinshi orynǵa jaıǵasty. Bul joly olar azýly klýb «Aqtóbeni» syrt alańda 3:0 esebimen oısyrata utty. Týrnır kestesinde «Astananyń» kósh bastaýshy «Ertisten» bir oıyny kem ekenin esepke alsaq, kimniń upaıy túgel degen suraqqa jaýap izdeýdiń qajeti joq.
Chempıonat bastalǵaly jeńilip kórmegen «Qaırat» teń oıynnan kóz ashpaı keledi. Almatylyqtar bul joly «Tobylmen» 2:2 esebimen teń oınap, taǵy da eki upaıdan aıyryldy. Ázirge tynysy ashylmaı, kesteniń belortasynda keledi.
Bul týrdaǵy basty oıynnyń biri Shymkentte «Ordabasy» men áli jeńilistiń ashy dámin tatpaǵan «Qaısar» arasynda ótken bolatyn. Tartysty matchta oıyn taǵdyryn jalǵyz gol sheship, «Ordabasy» kósh basyndaǵy komandalar arasynan oıyp oryn aldy. Al «Qaısar» bolsa, utylystyń uıatyn tuńǵysh ret sezindi.
Kósh sońynda shań jutqan «Shahter» men «Atyraýǵa» jeńis degen arman bolyp tur. Altynshy týrda Atyraýda ózara kúsh synasqan bul eki komanda armansyz «aıqasty». Degenmen, birin-biri ala almaı, 3:3 esebimen tarqasty.
О́tken týrda ózgermegen bir ǵana kórsetkish bar: Almatynyń «Qaıraty» áli jeńilgen joq...
Altynshy týrdyń oıyndary mynadaı nátıjelermen aıaqtaldy:
«Ordabasy» – «Qaısar» – 1:0 (0:0), Marsvaladze, 52 (1:0); «Astana» – «Aqtóbe» – 3:0 (1:0), Logvınenko, 12 (1:0). Kabananga, 87 – penaltıden (2:0). Jalmuqan, 90+1 (3:0); «Atyraý» – «Shahter» – 3:3 (1:2), Tájimbetov, 11 (0:1). Salomov, 28 (1:1). Haırýllın, 30 (1:2). Obshıvas , 78 (2:2). Skoryh, 83 – óz qaqpasyna (3:2). О́mirtaev, 90+1 (3:3); «Tobyl» – «Qaırat» – 2:2 (0:2), Ilıchevıch, 19 (0:1). Goý, 42 (0:2). Shetkın, 51 (1:2). Malyı, 83 (2:2); «Aqjaıyq» – «Oqjetpes» – 1:1 (0:1) Marochkın, 18 (0:1).Govedarısa, 90 (1:1); (Ertis» – «Taraz» – 5:2 (1:1) Muhametshın, 17 (0:1). Fonseka, 20 (1:1). Darabaev, 59 (2:1). Darabaev, 64 (3:1). Feshýk, 67 (3:2). Alıev, 78 (4:2). Dja Djedje, 82 (5:2).
Altynshy týrdan keıin surmergender toby bylaısha túzildi:
1. Jerar Goý – 6 gol;
2. Alekseı Shetkın – 4 gol.
Sáýirdiń 16-sy kúni ótetin 7-týrda myna komandalar ózara oınaıdy: «Oqjetpes» – «Astana», «Taraz» – «Aqjaıyq», «Qaısar» – «Ertis», «Qaırat» – «Ordabasy», «Shahter» – «Tobyl», «Aqtóbe» – «Atyraý».
Qaırat ÁBILDINOV,
«Egemen Qazaqstan»
