Zamanymyzdyń zańǵar skrıpkashylary Vıktor Tretıakov, Edýard Grach, Zahar Bron Aqbıke Alǵıdyń kásibı sheberligine óte joǵary baǵa bere kelip, jas skrıpkashynyń ózine tán tehnıkasyn, mýzykany erekshe qabiletpen sezinýin, ár shyǵarmanyń mánin fılosofııalyq turǵyda tereń túsinýin ómirde kóp tájirıbe jınaqtaǵan kánigi mamandar ǵana qol jetkize alatyn jeńiske balady.
Bir ǵajaby, Aqbıke Alǵı da mýzykanttar otbasynda dúnıege kelgen. Skrıpkada oınaýdy bes jasynda úırengen. Qazirgi tańda Qazaqstannyń eńbek sińirgen qaıratkeri Raısa Musaqojaevanyń shákirti.
Elimizdiń jáne shet eldiń belgili óner alańdarynda talantyna talaıdy tánti etken Aqbıkeniń ózin áńgimege tartqanymyzda:
– Kameralyq zaldyń sahnasynda men alǵash ret óner kórsetkeli otyrmyn. Sondyqtan, azdap qobaljý bar, biraq kórermenmen júzdesetin sátke asyǵýlymyn. «Astana Opera» teatry sahnasyna shyǵý kóp adamǵa arman. Soǵan qol jetkizgenime qýanamyn. Tyńdarmannyń I.S.Bah, V.A.Mosart, K.Debıýssı syndy tanymal kompozıtorlardyń áıgili shyǵarmalarymen qaýyshqanyn qalaımyn. Mýzyka – jan-júregińniń kúıi ǵana emes, bul – meniń ómirimniń máni. Meniń basty maqsatym – naǵyz mýzykant bolý, – dedi.
Onyń aıtýyna qaraǵanda, kesh baǵdarlamasyna N.Paganınıdiń, I.S.Bahtyń, V.A.Mosarttyń, P.I.Chaıkovskııdiń, F.Mendelsonnyń eń úzdik skrıpkalyq týyndylary kezdeısoq tańdalmaǵan eken. О́ıtkeni, skrıpkashynyń sheberligi, kásibı deńgeıi kóbine olardyń shyǵarmalary arqyly aıqyndalyp jatady. Osylaısha, tyńdarman nazaryna I.S.Bahtyń №1 jeke skrıpkaǵa arnalǵan sonatasy, I.Frolovtyń ǵajaıyp týyndysy, G.Gershvınniń «Porgı men Bess» operasynan alynǵan taqyryptardyń konserttik fantazııasy, F.Kreıslerdiń jeke skrıpkaǵa arnalǵan rechıtatıv jáne skerso-kaprıs týyndysy jáne munan basqa da birqatar dúnıeler usynylmaq.
Aqbıke Alǵıdyń aldaǵy kúnderge qurǵan josparlary óte kóp. Sonyń biri – ol jazda jasóspirimderdiń halyqaralyq P.I.Chaıkovskıı atyndaǵy baıqaýyna qatyspaq, eske sala ketetin jaıt, buǵan deıin óner ıesi osy saıystyń, Reseıde ótken jasóspirimderdiń halyqaralyq P.I.Chaıkovskıı atyndaǵy VIII baıqaýynyń dıplomanty atanǵan bolatyn. Sondyqtan, maýsymda elordada ótýi josparlanǵan H halyqaralyq Chaıkovskıı atyndaǵy konkýrsqa qatysý talantty qyzymyzdy ónerdiń taǵy bir taýdaı bıiginen tanytady dep senemiz. Fortepıano, skrıpka jáne vıolonchel mamandyǵy boıynsha ótetin Chaıkovskıı atyndaǵy saıys – qanaty jańadan qataıyp kele jatqan órender úshin eń joǵary jetistik bolyp sanalady. О́ıtkeni, bul halyqaralyq shara bolǵandyqtan, ártúrli memleketterde ótýi shart. Qatysýshylar sanymen, joǵary kásibı deńgeıimen, oryndaýshylyq sheberligimen, kúrdeli baǵdarlamalarǵa qurylýymen, halyqaralyq dárejedegi tanymal tulǵalardyń sarapshylyq etýimen erekshelenetin óner báıgesine qatysý, jeńimpaz ataný – jastarǵa arman. Bıyl da qazylar alqasy quramyna Qazaqstan, Reseı, AQSh, Japonııa, Koreı, Qytaı, Fransııa jáne Shveısarııanyń eń ataqty mýzykanttary enip otyr.
Konkýrstyń birinshi jáne ekinshi kezeńderi Qazaq ulttyq óner ýnıversıtetinde, úshinshisi «Astana Opera» teatrynda ótedi dep kútilýde. «EKSPO-2017» kórmesiniń eń aıtýly mádenı jobasy retinde baǵalanǵan halyqaralyq konkýrstyń bárinen buryn bizge qymbat bolatyn sebebi, munda qazaqtyń skrıpkashy qyzy óner kórsetedi.
Qarshyǵa KÚLEN
