Kórmedegi shyǵarmalardyń avtorlary – Qostanaı memlekettik pedagogıka ınstıtýtynyń ótken jylǵy túlekteri Elena Polkovnıkova, Anastasııa Merzlıak, Ksenııa Fedıaı jáne Anastasııa Iаgýdına. Olar kórmege ózderiniń qyryq shaqty jumysyn usynypty.
«Meniń aldymnan túrli stýdentter ótedi. Olardyń arasynda osy ónerdi janymen túsinetin talantty oqýshylar da boldy. Al kópshiligi sýret óneriniń álippesin ınstıtýt qabyrǵasynda bastaıdy. Meniń stýdentterimniń kópshiligi qazir bilim berý salasynda qyzmet etedi, ózime áriptes bolǵan. Qazir de olardyń izin jalǵastyryp kele jatqan sýretshi stýdentterim bar, meni osyndaı baılanystyń úzilmegeni qýantady», – dedi Kórkemóner kafedrasynyń oqytýshysy, sýretshi Ánýar Sápıev.
Ol keshegi shákirtiniń biri Anastasııa Iаgýdınadan kóp úmit kútedi.
«Qazir maıly boıaýmen salatyn keskindemege kóp kóńil bólýdemin. Munymen qosa grafıkalyq keskindememen, kompıýtermen sýret salýmen de aınalysamyn. Zaman talabyna saı jańalyqtardy da qabyldaý kerek. Bolashaqta ózimniń óner stýdııamdy ashqym keledi», – deıdi Anastasııa.
Jas sýretshilerdiń kórmesi shynaıylyǵymen jurtty baýrap aldy.
Názıra Járimbetova
«Egemen Qazaqstan»
QOSTANAI
