Kezdesý barysynda Memleket basshysyna «Qazaqstannyń úshinshi jańǵyrýy: jahandyq básekege qabilettilik» atty joldaýdy iske asyrý baǵytynda Úkimettiń atqaryp jatqan jumysy týraly esep berildi, sondaı-aq 2017 jylǵy birinshi toqsannyń qorytyndysy boıynsha memlekettik jáne salalyq baǵdarlamalardyń oryndalýy jóninde málimet usynyldy.
Nursultan Nazarbaev buǵan deıin bekitilgen damý baǵdarlamalaryn iske asyrýdyń mańyzdylyǵyn, olardyń oryndalýyna sapaly baqylaý jasaý qajet ekenin atap ótti.
– Birinshi toqsannyń qorytyndysy boıynsha elimizdiń ekonomıkasy 3%-ǵa ósti. Bul – baǵdarlamalarymyzdyń júzege asyrylý nátıjesi. Osy baǵyttaǵy jumystardy jalǵastyrý qajet jáne jyl sońyna deıin kórsetkishterdi arttyryp, olardy tıimdi deńgeıde saqtap qalý kerek. Buǵan qajetti alǵysharttar bar, – dedi Qazaqstan Prezıdenti.
Sondaı-aq, Elbasy aldaǵy is-sharalar jaıyna toqtalyp, olardy oıdaǵydaı ótkizý úshin jan-jaqty daıyndyq pen baqylaý júrgizý qajet ekenin aıtty.
– Taıaýda Qazaqstanǵa Túrikmenstan basshylyǵynyń saparmen kelýi josparlanýda. Aldymyzda Astanada ótetin Shanhaı yntymaqtastyq uıymynyń sammıti, «EKSPO-2017» halyqaralyq kórmesi bar. Sonymen qatar, elimizdiń odan ári damýynyń basty maqsattary týraly da umytpaý kerek, – dedi Memleket basshysy.
Budan bólek, Nursultan Nazarbaev «Bolashaqqa baǵdar: rýhanı jańǵyrý» atty baǵdarlamalyq maqalada qoıylǵan mindetterdi iske asyrýdyń mańyzdylyǵyn atap ótti.
Qazaqstan Prezıdenti aldaǵy jumystar aıasynda Úkimetke júktelgen jaýapkershiliktiń joǵary ekenine toqtalyp, bul úderiske jurtshylyqty, sonyń ishinde zııaly qaýym, jastar, úkimettik emes sektor ókilderin tartý qajet ekenin aıtty.
– «Bolashaqqa baǵdar: rýhanı jańǵyrý» atty maqala kóp jyldan beri oıda júrgen bolatyn. Qazirgi ýaqytta maqalada qoıylǵan mindetterdi naqty iske asyrý jónindegi jospar ázirlenýde. Qarajat qajet etetin jobalar da bar. Alaıda, olardyń kóbi respýblıkalyq bıýdjetten qosymsha qarjy bólýdi qajet etpeıdi, – dedi Elbasy.
Memleket basshysy kóptegen qazaqstandyqtardyń aıtylǵan bastamalardy qyzý qoldap otyrǵanyna nazar aýdardy.
– Kún saıyn maǵan elimizdiń ár óńirindegi jurtshylyq ókilderinen maqaladaǵy usynylǵan sheshimderge qoldaý bildirgen kóptegen jedelhattar kelip jatyr. Olardyń qatarynda túrli shyǵarmashylyq ujymdar, zııaly qaýym ókilderi jáne jastar da bar, – dedi Nursultan Nazarbaev.
Qazaqstan Prezıdenti rýhanı jańǵyrýdyń belgilengen baǵyttary boıynsha júrgiziletin jumystar joǵary sapaly deńgeıde oryndalýǵa tıis ekenin atap ótti.
B.Saǵyntaev Elbasyǵa birinshi toqsannyń qorytyndysy boıynsha qysqa merzimdi ekonomıkalyq kórsetkishterdiń ósip kele jatqany týraly baıandady. Premer-Mınıstrdiń málimetine sáıkes, ónerkásiptiń taý-ken salasyndaǵy jáne qaıta óńdeý sektorlaryndaǵy kórsetkishter joǵary deńgeıge jetti.
Sondaı-aq, B.Saǵyntaev Memleket basshysyna Úkimet ákimdiktermen, iri holdıngtermen jáne kompanııalarmen birlesip qolǵa alǵan tehnologııalyq jańǵyrý jónindegi jol qartasynyń ázirlený barysy týraly málimdedi.
Kezdesý sońynda Nursultan Nazarbaev birqatar naqty tapsyrma berdi.
