Qaramyrza aýylynda 7 úıdi aýlasymen sý basty. Úılerden 10 adam týystary men tanystarynyń úıine ornalastyryldy. Osyndaǵy «Ramazan» sharýashylylyǵynyń tehnıkalary sýdan qutqarý jumystaryna kómekke keldi. Sý ketetin 45 shaqyrymdyq 3 aryq qazyldy. Sý basqan úılerdiń maly da qutqaryldy. Oblystyq Tótenshe jaǵdaılar departamenti baspasóz qyzmetiniń habarlaýynsha, Qarasý aýdanynda munan basqa Bakan, Oktıabrskoe, Koshevoe jáne Jeleznodorojnoe eldi mekenderin de qarǵyn sý mazalap tur. Turǵyndar qar sýynyń qarqyny kúshti jáne deńgeıi 1,5 metrge deıin barǵanyn aıtady. Mal shyǵyny oryn alǵan.Qar sýy Qarasý aýdany ortalyǵyndaǵy birneshe kóshe sýda qaldy.
Al Áýlıekól aýdanynda Kóktal jáne Dıev aýyldaryna sý kirgen. Onda 15 úı men osynsha úıdiń aýlasy sý da qaldy. Olardan 42 adam kóshirildi, sonymen qatar 45 iri qara, 81 usaq mal sýdan shyǵaryldy.
Sonymen qatar oblystaǵy birneshe joldar da sýdan zardap shekti, birneshe jerden sý buzyp ketti. Ekaterınbýrg-Almaty respýblıkalyq tas jolynyń Sarykól aýdany men Soltústik Qazaqstan oblysy shekarasy arasy tasqyn sý shaıyp ketkendikten jabyldy. Qostanaı-Áýlıekól-Súrgen tas jolynyń Oktıabr selosy men Qoıbaǵar stansasyna deıingi arasyn da sý basty. Qazir sýdyń zardaptaryn joıý jumystary júrgizilýde.
«Sáýirdiń 15 men 17 –i arasynda kúnniń kúrt jylýyna, qardyń jyldam erýine baılanysty sý tasqyny shegine jetti. Erteń de qaýip bar, sosyn qarǵyn sýdyń beti qaıtady. Sý basqan barlyq eldi mekenderde Tótenshe jaǵdaı departamentiniń qutqarý toptary jergilikti atqarý organdary jáne sharýashylyqtarmen tize qosyp, sý shaıǵan aýlalardan, úılerden adamdardy kóshirdi, maldardy qurǵaqqa shyǵardy. Tehnıka jetkilikti, jumystar jalǵasýda», dedi oblystyq tótenshe jaǵdaılar departamentiniń bastyǵy Talǵat Kákimov.
Názıra Járimbetova,
«Egemen Qazaqstan»
