Májilisti ashqan Mádenıet jáne sport mınıstri Arystanbek Muhamedıuly eń aldymen mınıstrlik quramyndaǵy Týrızm ındýstrııasy komıtetiniń tóraǵasy qyzmetine kirisken Maınur Myrzamadıevany tanystyrdy. Sosyn, Elbasynyń «Bolashaqqa baǵdar: rýhanı jańǵyrý» maqalasy tóńiregindegi oı-pikirlerimen, aldaǵy atqarylar aýqymdy istermen bólisti.
«Elbasy barlyǵymyzdy kúshimizdi biriktirýge, shyǵarmashylyq zııaly qaýymdy, Ǵylym akademııasyn, qoǵamdyq uıymdardy, jalpy ulttyń taǵdyryna beı-jaı qaramaıtyndardy tyǵyz baılanysta jumys jasaýǵa shaqyrdy. Elimizdiń myń jyldyq tarıhynda biz alǵash ret qoǵamdyq sananyń jańǵyrýyna, mádenı genetıkalyq kodtyń saqtalýyna baǵyttalǵan syndarly qadam jasap otyrmyz» degen mınıstr kópshilikti osy ǵasyrǵa qajetti barlyq qasıetti boıǵa jınaqtaýǵa, ózgermeıtin taptaýryn úlgilerden qutylyp, bilim men quzyrettilikti arttyrýǵa shaqyrdy. Bul oraıda jańalyqqa ashyqtyq, halyqaralyq daǵdylar men tájirıbelerdi úırený jaıy da qozǵaldy.
Elbasynyń eldik sanany jańǵyrtý úshin naqty jobalar usynǵany belgili. Latyn álipbıine qatysty mınıstr tek Bilim jáne ǵylym mınıstrligimen birigip jumys isteımiz degendi baıandady. Sondaı-aq, tıisti komıtettiń jalpy ulttyq túsindirý jumysyn atqarý qajettigi týraly qysqa qaıyrdy.
Mınıstr Elbasynyń mańyzdy jobalarynyń biri – «Týǵan jerdiń» jalpyulttyq patrıotızmniń naǵyz ózegine aınalatynyn málimdedi. «Bul baǵytta mınıstrlik tarapynan mańyzdy jumys atqarylýda. Búgingi tańda Parlamentte qaralyp jatqan «Mádenıet týraly» zań jobasynda eksperttik komıssııa qurý arqyly qoǵamdyq mańyzy bar ádebıetti konkýrstyq negizde tańdaý jáne avtorlyq qalamaqy tólenip, olardy satyp alý boıynsha norma kózdelgen.Atalǵan norma sapaly ádebı shyǵarmalar jasaýdy yntalandyrýǵa, Qazaqstan halqynyń mádenı murasyn saqtaýǵa jáne týǵan jerine, eline degen súıispenshilikke baýlýǵa baǵyttalǵan», dedi mınıstr.
Al Elbasy usynǵan «Qazaqstannyń kıeli jerleriniń geografııasy» jobasy týraly áńgimelegende A.Muhamedıuly týrızm salasynyń «altyn» dáýiri endi bastalǵanyn jetkizdi. Týrızmniń energetıka, agroónerkásiptik keshen, saýda, kólik, ındýstrııalandyrý sekildi aýqymdy salalarmen birge, damýy tıis basymdyqtardyń qatarynda turǵanyn aıtty. «Sondyqtan, Mádenıet ınstıtýty men Týrızm komıtetine múddeli taraptarmen birlesip bir aı ishinde elimizdiń kıeli oryndarynyń kartasyn jasaqtaýdy tapsyramyn. Sondaı-aq, olardy keńinen zerttep, ári qaraı nasıhattaýǵa baǵyttalǵan jospar jasaqtalýy tıis. О́z kezeginde Mádenıet departamenti «Discovery», «National Geographic» telearnalarymen birlesip Qazaqstan týraly ǵylymı-tanymdyq fılmder serııasyn shyǵarý máselesin tııanaqtaýy qajet», dedi ol.
Aıta keteıik, alqa májilisinde Abaıdyń «Jıdebaı-Bórili» memlekettik tarıhı-mádenı jáne ádebı-memorıaldy qoryq-murajaıynyń dırektory Bolat Júnisbekov, Qazaqstan týrıstik qaýymdastyǵynyń dırektory Ráshıda Sháıkenova, «Astana-Opera» teatrynyń dırektory Ǵalym Ahmedıarov jáne Ulttyq akademııalyq kitaphananyń bas dırektory Úmithan Muńalbaeva baıandama jasady.
Aıgúl SEIILOVA,
Sýretti túsirgen Erlan OMAROV,
«Egemen Qazaqstan»
