Alqaly jıyndy júrgizip otyrǵan óńir basshysy Janseıit Túımebaev kún tártibine toqtalyp, Elbasynyń maqalasy memlekettik ıdeologııany anyqtaıtyn basty saıası qujat bolyp tabylatynyn aıtty.
− Prezıdentimiz úshinshi jańǵyrý úderisteriniń maqsattary men mindetterin kóregendikpen naqtylaı otyryp, endi rýhanı jańǵyrýdyń Joldaýy ispetti dúnıesin jarııalap, sáýlesi bar sanalardy dúr silkindirip otyr. «О́tken ǵasyrdyń basty úsh ıdeologııasy – kommýnızm, fashızm jáne lıberalızm bizdiń kóz aldymyzda kúıredi», – deıdi Elbasymyz óziniń maqalasynda. Sondyqtan da, Kóshbasshy meńzegendeı, búginde radıkaldy ıdeologııalar ǵasyrynyń kelmeske ketkenin birjolata moıyndaýymyz kerek, – dedi.
«Prezıdent naqty jobalar retinde birinshiden, qazaq tilin birtindep latyn álipbıine kóshirý, ekinshi, qoǵamdyq jáne gýmanıtarlyq ǵylymdar boıynsha «Jańa gýmanıtarlyq bilim. Qazaq tilindegi 100 jańa oqýlyq» jobasyn júzege asyrý, úshinshiden, «Týǵan jer» baǵdarlamasyn qolǵa alyp, onyń aýqymyn «Týǵan elge» ulastyrý, tórtinshiden, jalpyulttyq qasıetti oryndar uǵymyn sanalarǵa sińirý úshin «Qazaqstannyń qasıetti rýhanı qundylyqtary» nemese «Qazaqstannyń kıeli jerleriniń geografııasy» jobasyn jasaý, besinshiden, mádenıettiń básekelestik qabiletin qalyptastyrý úshin «Jahandaǵy zamanaýı qazaqstandyq mádenıet» jobasyn iske asyrý, altynshydan, zamandastarymyzdyń jetistikteri tarıhyna nazar aýdarýy úshin «Qazaqstandaǵy 100 jańa esim» jobasyn qolǵa alý belgilengen.Maqalada kórsetilgen mańyzdy máselelerdi jetik meńgerý kerektigin, búkil Ońtústik turǵyndaryna tereń túsindirýge tıispiz», dedi J.Túımebaev oblys aktıvimen bolǵan kezdesýde.
Jıynda alǵashqy bolyp sóz alǵan Halyqaralyq «Alash» syılyǵynyń laýreaty, jazýshy Marhabat Baıǵut baǵdarlamalyq maqalany Joldaýdyń jarasymdy jalǵasy, rýhanı syńary dep sózin sabaqtady. Rýhanı jańǵyrý, erekshe silkinisti ult bolashaǵyna alańdaıtyn jamaǵat kópten beri kútip júrgen. Elbasymyzdyń kemeńgerligi jańa turpatty jańǵyrýdy naǵyz pisip jetken mezgilinde kóterýi boldy. Osylaı degen jazýshy sonymen qatar, oblystaǵy rýhanı salada atqarylyp jatqan jumystarǵa taldaý jasaı kelip, Ordabasy taýyn ulyqtaý máselesi umyt qalǵanyna alańdaýshylyǵyn bildirdi.
«Nur Otan» partııasy oblystyq fılıaly tóraǵasynyń birinshi orynbasary Álimjan Qurtaev Elbasynyń «eger jańǵyrý eldiń ulttyq – rýhanı tamyrynan nár ala almasa, ol adasýǵa bastaıdy» degen túıindi sózin basshylyqqa alyp, jumys jasaýdyń jaıyn aıtty. Maqalada kóterilgen máselelerdi halyqqa jetkizýde «Nur Otan» partııasynyń músheleri belsendilik tanytatyndyǵyn bildirdi. Jıynda sóz alǵan Shymkent qalasyndaǵy №65 mektep-gımnazııasynyń dırektory Qatıra Qadyrbaeva men oblystyq «Iýjnyı Kazahstan» gazeti bas redaktorynyń orynbasary Keńes Ismaılov ta óz pikirlerin ortaǵa saldy.
Prezıdentimizdiń maqalasynda aıtylǵan oı-pikirlerdi júzege asyrýda jan-jaqty jumylýdyń qajettigin aıtqan aımaq basshysy oblys ákiminiń orynbasary Ulasbek Sádibekuly men oblystyq ishki saıasat basqarmasyna maqalany nasıhattaý boıynsha aǵymdaǵy jyldyń sońyna deıin oblystyq jáne aýdan, qalalyq deńgeıde is-sharalar uıymdastyryp, jelilik keste ázirleýdi tapsyrdy.
Baqtııar TAIJAN,
«Egemen Qazaqstan»
Ońtústik qazaqstan oblysy
