Jıyndy ashqan G.Isimbaeva Prezıdent N.Nazarbaevtyń bastamasymen qabyldanǵan Bes ınstıtýttyq reformany iske asyrý jónindegi «100 naqty qadam» Ult josparynyń 98-qadamynda aýdandyq mańyzy bar qalalar, kentter, aýyldar, aýyldyq okrýgter deńgeıinde derbes bıýdjet engizý mindetteri belgilengendigin jáne Elbasy bul sharalardy iske asyrýǵa qatysty bıylǵy Joldaýynda taǵy da birqatar tapsyrma bergenin aıtty.
«Memleket basshysy Joldaýda qarjy shyǵysyn aýdandyq jáne aýyldyq deńgeıge berý jóninde naqty tapsyrma júktedi. Muny qabyldaý nátıjesinde aýyl turǵyndarynyń mańyzdy qajettilikteri qysqa merzim ishinde qanaǵattandyrylyp, oǵan zor múmkinshilikter berilmek. Iаǵnı, aýyldyq jerdiń óz qarajaty bolyp, týyndaǵan máselelerdi ózderi edel-jedel sheshýge kirisedi degen sóz. Sondyqtan, qazirgi kezde Májiliste qaralyp jatqan jergilikti ózin ózi basqarýdy damytý máselesi jónindegi zań jobasynyń mán-mańyzy erekshe. Atap aıtqanda, aýyldyq eldi mekenderdi sýmen qamtamasyz etýge, avtokólik joldaryn salýǵa, kútip ustaý jáne jóndeýge, memlekettik turǵyn úı qoryn kútip saqtaýdy uıymdastyrýǵa bıýdjettik qarajattardy paıdalanýǵa múmkindikter berilmek. Sonymen qatar, zań qabyldanǵannan keıin halyqtyń kúndelikti qajetti muqtajdyqtaryn, ásirese, oqýshylardy jaqyn mańdaǵy mektepterge tegin aparyp, alyp qaıtý, aýyr syrqatty adamdardy aýrýhanalarǵa jetkizýdi uıymdastyrý, áleýmettik kómekke muqtaj azamattarǵa úılerinde kómek kórsetý sııaqty máseleler oń sheshimin taýyp, oǵan azamattar tikeleı qatysatyn bolady», – dedi G.Isimbaeva.
Al atalǵan máselege qatysty arnaıy baıandama jasaǵan Ulttyq ekonomıka mınıstri T.Súleımenov bul talqylaý jergilikti ózin ózi basqarýdyń derbes bıýdjeti men kommýnaldyq menshikti engizý jónindegi Is-sharalar josparyn ýaqtyly daıyndaýǵa múmkindik týǵyzatynyn kópshiliktiń qaperine saldy. Sonyń aıasynda memlekettik organdar men uıymdarǵa 2017 jylǵy 1 maýsymǵa deıin aýyldyq okrýgterdegi jyljymaıtyn jáne jyljymaly múlikterdiń tirkelmegen nysandaryn anyqtaýǵa, jyl sońyna deıin memlekettik organdardyń aqparattyq júıeleri men derekter bazasynyń tolyq daıyndyǵyn tekserý, ózektendirý ári ıntegrasııalaý jolymen qamtamasyz etýge naqty tapsyrmalar berilgenin habarlady. Mınıstrdiń málimetinshe, osy kúnderi elimizde 16 aýyldyq okrýg kompıýter quraldarymen qamtamasyz etilmegendikten, máseleni bıylǵy jyldyń 1 qarashasyna deıin sheshý oblys ákimdikterine júktelgen kórinedi.
«Sondaı-aq, Is-sharalar josparyna sáıkes, jergilikti atqarýshy organdar 1 qyrkúıekke deıingi merzimde aýyldyq okrýgter ákimderiniń apparatyn qajetti jyldamdyqtaǵy ınternetpen qamtamasyz etýi tıis. Oǵan qosa, bıýdjetpen jáne kommýnaldyq múlikpen jumys júrgizý úshin joǵary nemese arnaýly orta bilimi bar ekonomıkalyq, qarjylyq jáne býhgalter mamandary qajettigi aıqyn sezilýde. Osy máseleni de tıimdi sheshýdiń joldaryn qarastyrýymyz kerek», – dedi T.Súleımenov.
Al Májilis depýtaty, zań jobasyn qaraý jónindegi jumys tobynyń jetekshisi ári «Nur Otan» partııasy fraksııasy jetekshisiniń orynbasary A.Bazarbaev óz sózinde zańdy qaraý barysynda depýtattyq korpýs ókilderi men Úkimet músheleri birlesip qomaqty jumystar atqarǵanyn, sonymen qatar, fraksııa músheleriniń arqasynda Úkimet zań qabyldanǵanǵa deıin ony naqty iske asyrý jóninde Is-sharalar jospary alǵash ret ázirlengenin alǵa tartty. Sońynda memlekettik organdar men kvazımemlekettik sektor uıymdarynyń ókilderi usynys-pikirlerin bildirip, qorytyndysy boıynsha fraksııanyń qaýlysy qabyldandy.
Nurlybek DOSYBAI,
«Egemen Qazaqstan»
