– Saıajaılardaǵy 579 úı men aýlany sý basyp, 1 174 adam qaýipsiz jerlerge kóshirildi, 69 adam qutqaryldy. Adamdardy ýaqytsha ornalastyrý beketteriniń jeteýinde 572 adam bar, onyń 159-y bala. Olardy úsh ret tamaqtandyrý jaǵy uıymdastyrylǵan,– dedi departament bastyǵy Baýyrjan Syzdyqov.
Oblys aýmaǵynda 13 tasqynǵa qarsy shtab qurylyp, turǵyndardan 1 834 ótinish túsken. Bóget jasaý úshin 4 145 tekshe metr ınerttik materıaldar ákelinip, 205,8 myń tekshe metr sý aıdalǵan. Hromtaý men Mártókte Elek pen Qarǵaly ózenderiniń arnasynan shyǵýy múmkin degen jerlerin bógeý boıynsha aldyn alý jumystary júrgizildi.
8 sáýirden bastap óńirde kún kúrt jylyp, qar tez erı bastaǵan-dy. Qarǵaly jáne Aqtóbe sý qoımalarynyń sý jınaǵyshtarynda áli kúnge deıin jerdiń 11-den 21 santımetrge deıingi toń qabaty erimegen. Iаǵnı, jer betindegi qar men muz jerge sińbeı, sý qoımalarǵa jınalýda.
16 sáýirde Aqtóbede jergilikti deńgeıde sıpaty bar tótenshe jaǵdaı jarııalanǵan bolatyn. Tasqynnyń saldaryn joıý oryndarynan kóshirilgen azamattardyń múlikterin tonaýǵa jol bermeý maqsatynda 21 beket ornatyldy. Materıaldyq quraldardy shyǵarýǵa jáne ýaqytsha ornalastyrý beketterine jetkizýge kómektesý toptary jiberildi.
Sondaı-aq, sý tasqynynan zardap shekkenderge kómek kórsetetin áleýmettik komıssııa quryldy. Ony Aqtóbe qalasy ákiminiń orynbasarlary Lázzat Orazbaeva, Rýzııa Aıdasheva basqarady. Komıssııa otyrysy kezinde ortaq esepshot ashyldy. Aqtóbedegi isker áıelder qaýymy kómektesýge daıyn. Al «Nur Otan» partııasynyń músheleri bir kúndik jalaqyny aýdarýǵa úndeý tastady. Komıssııanyń negizgi jumysy sý tartylyp, saıajaıdaǵy úılerge kirý múmkindigi berilgen kezde jandanady. Ázirge, zattaı, qarjylaı kómek bir jerge jınalady.
Temir QUSAIYN,
«Egemen Qazaqstan»
AQTО́BE
