Qalam ıeleri tarapynan sý tasqynynan zardap shekkenderge baılanysty saýaldar qoıylyp, atqarylyp jatqan sharalar keńinen áńgimelendi. Sáýir aıy naǵyz syn kezeńine aınaldy. Bıyl ylǵaldyń mol túsýine oraı jergilikti bılik sý tasqynynyń aldyn alý jumystaryna bir kisideı jumylyp otyrǵanyn aıta kelip, Qumar Irgebaıuly Ǵ.Músirepov aýdanynda oryn alǵan oqys oqıǵa erekshe baqylaýda turǵanyn, sý astynda qalǵan 235 úıdiń bárine qarjylyq járdem kórsetiletinin, 7 baspananyń múldem jaramsyz qalǵanyn, qazir shyǵyn kólemi eseptelip jatqanyn jetkizdi. Apatty jerlerdi qalpyna keltirý isi aıaqtalyp, ol jaqqa qosymsha kúshter jiberilgen. Jambaraq ózenine taıaý ornalasqan Rýzaevka aýylynyń sý basqan 186 úıi de járdemsiz qalmaıdy. 578 turǵyn qaýipsiz jerlerge kóshirilip, ystyq tamaqpen, jatyn orynmen tolyq qamtamasyz etilgen.
Bir sharýa qojalyǵynyń qora-qopsysy sý astynda qalyp, júzge jýyq usaq maly shyǵyn boldy. Oǵan da materıaldyq kómek beriledi. Oblys ákiminiń aıtýynsha, tabıǵı apatqa baılanysty arnaıy komıssııa qurylyp, qurylys brıgadalary tartylady. Shyǵyn kólemi naqty eseptelgen soń, bıýdjetten qarjy qarastyrylady. Basqa da shuǵyl sheshimder qabyldanady. Qazir qarǵyn sý deńgeıiniń tómendegeni baıqalady. Sý apatynyń saldary boıynsha keshendi sharalar odan ári jalǵasýda.
Aqan-Burlyq ózenine jaqyn ornalasqan Chıstopole eldi mekeninde jaǵdaıdyń kúrdeli ekeni eskerilip, turǵyndar men maldar qaýipsiz jerlerge kóshirilgen.
Q.Aqsaqalovtyń sózine qaraǵanda, jaǵdaı jiti baqylaýda tur. Qaýip seıilgenshe kómek úzilmeıdi. Osyndaı qaterdiń bolatyny kúniburyn eskerilip, azyq-túlik pen dári-dármektiń jetkilikti qory qamtamasyz etilgen. Qaterli aımaqtarda tehnıka men qaıyqtar sany kóbeıtilgen.
О́mir ESQALI,
«Egemen Qazaqstan»
Soltústik Qazaqstan oblysy
