Keshe aýdanǵa oblys ákiminiń orynbasary Ǵaýez Nurmuhambetov baryp, jaǵdaıdyń barlyǵyn kózimen kórdi. Ásirese, sýdyń deńgeıi 1,5 metrge deıin kóterilgen Koshevoe, Qaramyrza aýyldarynda aýyr jaǵdaı oryn aldy. Bul aýyldarda sý kirgen qorada turǵan usaq mal, buzaý, shoshqa shyǵyn boldy. Zelenov aýylynda 10 úıdiń ózi jáne 5 úıdiń aýlasy sýda qalǵan. Olardan 53 adam qaýipsiz jerge kóshirildi. Qaramyrza aýylynda da 7 úı sýda tur, 7 úıdiń qora-qopsysy kishigirim kólshikke aınaldy. On adam basqa jerge kóshirildi.
Áýlıekól aýdanyndaǵy Kóktal aýylynda 15 úıge sý kirgen, 15 úıdiń aýlasyn sý basqan. 42 adam týystarynyń úıine kóshirildi, 55 iri qara, 81 usaq mal qurǵaqqa shyǵaryldy. Eki aýdanda da Tótenshe jaǵdaılar departamentinen qutqarýshylar, qajetti tehnıkalar jumys isteýde, sonymen qatar, aýdandyq atqarý organdarynan da adamdar men tehnıka jetkilikti bólingen. Tótenshe jaǵdaıǵa baılanysty qarǵyn sýdyń zardabynan bolǵan shyǵyndy esepteý komıssııasy qurylyp, jumys isteı bastady.
– Sýdyń beti endi qaıtty. Qazir sý basqan eldi mekenderdiń barlyq shyǵynyn esepteý múmkin emes. Ázirshe sýda qalyp, ólgen maldyń shyǵyny ǵana óteledi. Sol úshin quramynda veterınar, basqa da mamandar bar komıssııa iske kiristi. Al sýda qalǵan turǵyndardyń basqa shyǵyny sál keıinirek, sýdan tazartylyp, keptirý jumystary sekildi zardaptardy joıý jumystary aıaqtalǵan soń anyqtalady, – dedi Qarasý aýdany ákiminiń orynbasary Erlan Baljaqaev.
Oblys basshylyǵynyń sheshimimen sý tasqynynan zardap shekken turǵyndarǵa qarjylaı kómek kórsetiletin boldy.
Názıra JÁRIMBETOVA,
«Egemen Qazaqstan»
QOSTANAI
