«Oblystaǵy etnomádenı birlestikter Elbasy saıasatyn qoldap, elimizdegi tatýlyq pen turaqtylyqty nyǵaıtýǵa úles qosyp keledi. Qoǵamdyq jáne saıası, basqa da aýqymdy is-sharalarǵa belsendi túrde atsalysady», deıdi Shyǵys Qazaqstan oblysy Qazaqstan halqy Assambleıasy hatshylyǵynyń meńgerýshisi Asqar Nurǵazıev.
Ádette, Dostyq úıleri, etnomádenı birlestikter jaıynda sóz qozǵalǵanda, jurttyń kóbi olar án salyp, bı bılep, konsert qoıýmen ǵana shuǵyldanady dep oılaıdy. Shyn máninde, olaı emes. Qoǵamdyq kelisim ortalyqtary qoǵamdaǵy mańyzdy máselelerge der kezinde ún qatyp, óz úlesterin qosyp otyrady. Máselen, byltyr oblystaǵy Dostyq úıleri óńirde medıasııanyń keńinen qoldanylýyna qoldaý bildirip, jergilikti quqyq qorǵaý salasynyń ókilderimen birge birqatar sharalardy júzege asyrdy.
Máselen, 2016 jyldyń aqpan aıynda О́skemendegi Dostyq úıi-qoǵamdyq kelisim ortalyǵynda medıasııa ınstıtýtyn damytý maqsatynda «Shańyraq», «Alternatıva» medıasııa ortalyqtarymen, Medıatorlardyń ulttyq palatasymen, densaýlyq saqtaý, bilim berý basqarmalarymen, ishki ister, ádilet departamentterimen jáne oblystyq sotpen memorandýmǵa qol qoıdy. Nátıjesinde, oblysta 74 medıasııa kabıneti ashylyp, 16 aýdanda medıasııa boıynsha 218 kásibı emes medıatorlar oqytyldy.
Taǵy bir aıta keter dúnıe, byltyr Shyǵys Qazaqstan oblysy Qazaqstan halqy Assambleıasy janynan mesenattar klýby qurylyp, «Mektepke jol» respýblıkalyq aksııasy aıasynda az qamtylǵan otbasylarynan shyqqan 258 balaǵa 4 mln teńge kóleminde kómek kórsetildi. Tarıh ǵylymdarynyń kandıdaty Nellı Krasnobaeva jetekshilik etetin Ǵylymı-sarapshylyq toptyń atqaryp jatqan jumystary óz aldyna bir tóbe.
О́skemendegi Dostyq úıi-qoǵamdyq kelisim ortalyǵynyń dırektory Eldar Tóleýbekovtiń aıtýynsha, oblys ortalyǵynda 22 etnomádenı birlestik jumys isteıdi. Buǵan birlestikter janyndaǵy klýbtar men jastar lıgalaryn qosyńyz.
Osydan birer kún buryn oblys ortalyǵynda atalyp ótken Pasha merekesinde ázerbaıjan etnomádenı birlestigi tóraǵasynyń orynbasary Tarbız Faradjevty jolyqtyrdyq.
«Bıyl ázerbaıjan halqynyń Qazaqstanǵa kelgenine 80 jyl tolady. Atap ótsek degen oıymyz bar. Bizdiń ata-babalarymyz deportasııalanǵan kezde Qudaıdyń qalaýymen osynaý peıish mekenge kelý baqyty buıyrypty. Basqa elge barsaq, qandaı kúıge tap bolarymyzdy kim bilgen?! Týǵan jerinen jyraqtap, toz-tozy shyǵyp kelgen ázerbaıjandardy qazaq halqy qushaq jaıa qarsy aldy. Darhan kóńil eldiń qamqorlyǵynyń arqasynda býynymyz bekip, tirshiligimizdiń tini nyǵaıdy. О́stik, óndik. О́zgesiń dep eshkim bizdi ózekke tepken joq. Elbasynyń salıqaly saıasatynyń, qazaqtyń qonaqjaılyǵynyń arqasynda búginde Qazaqstandaǵy barlyq ulttar tatý-tátti ǵumyr keship jatyr. Elimizdegi barlyq merekelerdi bir kisideı atap ótemiz. Naýryz merekesin toılaımyz. Búgin, mine, Pasha merekesine keldik. Mundaı merekeler elimizdi meken etken ulttar men ulystardy bir-birine jaqyndastyrady, baýyrlastyrady. Qazaq halqynyń tóńiregine toptastyrady. Sondyqtan, elimizde tek qana beıbitshilik saltanat qursyn degen tilek aıtamyn», deıdi ol.
Tarbız Faradjev ázerbaıjandardyń óneri men mádenıetin nasıhattaýǵa erekshe kóńil bólinetinin, «Karabah» dep atalatyn bı toby bar ekenin aıtyp, jaqynda ansambl ashýdy josparlap otyrǵandaryn jetkizdi.
Alashtyń rýhanı astanasy sanalatyn Semeı qalasyndaǵy Dostyq úıinde 18 etnomádenı birlestik bar. Mekeme dırektory Berik Kópbaev birlestik músheleriniń qaladaǵy qoǵamdyq, mádenı is-sharalarǵa belsene qatysatynyn aıtady.
«Ásirese tatar, nemis, evreı birlestikteriniń jumysyn erekshe atap ótýge bolady. Tatarlar tarıhı otany Tatarstanmen tyǵyz baılanys ornatqan. Buǵan dálel retinde Semeıde ótken Sabantoı merekesine Mıntemir Sháımıevtiń arnaıy kelip qatysqanyn aıtýǵa bolatyn shyǵar. Nemister de Germanııa elshiligimen jaqsy qarym-qatynasta. О́zge ult ókilderiniń óz mádenıeti men salt-dástúrlerin umytpaýyna erekshe kóńil bólinedi. Tatarlardyń «Irtısh monlary», orystardyń «Istokı», «Bratsy», nemisterdiń «Anhaıt», koreılerdiń «Hotnabı» sekildi ansamblderin semeılikter jaqsy biledi. Dostyq úıi janyndaǵy keshki jeksenbilik mektepterde tatar, nemis, orys, evreı tilderi oqytylady», deıdi ol.
Azamat QASYM,
«Egemen Qazaqstan»
Shyǵys Qazaqstan oblysy
