Muny oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Erkin Shpanov jumyspen qamtý ortalyqtarynyń ár jumyssyzdyń túıindemesin jete zerdelemeıtinimen de baılanystyrady. Mysaly, jaýapkershiligi shekteýli «KKTS» seriktestigi Qurmanǵazy, Jylyoı, Isataı aýdandaryna 47 elektr mamanyna suranys bergen, alaıda jumyssyz retinde 20 elektr tirkelip turǵanyna qaramastan, mekemege túıindeme jiberilmepti. Jumyspen qamtý ortalyqtaryna habarlasqan 6 462 adamnyń 38,8 paıyzy turaqty qyzmetke ornalasqan. Maqat, Qurmanǵazy, Mahambet aýdandarynda bul baǵyttaǵy sharalar áli de jetildirýdi qajet etedi.
«Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasyn» júzege asyrýdyń jaı-japsary oblys ákimi Nurlan Noǵaevtyń tóraǵalyǵymen ótken májiliste aıtyldy. Tehnıkalyq jáne kásiptik bilimmen, qysqa merzimdi kásiptik oqýmen qamtasyz etý týraly baıandaǵan oblystyq bilim berý basqarmasynyń basshysy Nursáýle Saılaýova aımaqtaǵy 25 orta arnaýly oqý oryndarynda 74 mamandyq, 145 biliktilik boıynsha oqý úderisi uıymdastyrylǵanynan habardar etti. Olardaǵy 17,4 myń stýdenttiń 7,5 myńy memlekettik tapsyrys negizinde oqıdy. О́tken oqý jylynda kolledj bitirgen túlekterdiń 79,2 paıyzy jumysqa ornalasqan.
Jıynda halyqty jumyspen qamtý, eńbek naryǵyn damytý, otandyq jáne sheteldik kompanııalarda jalpyǵa ortaq zańdylyqtardy saqtaý, mindetti áleýmettik medısınalyq saqtandyrý jaıynda da aıtyldy.
Baqytgúl BABASh,
«Egemen Qazaqstan»
ATYRAÝ
