Fınalǵa joldama alǵan 20 boksshy 10 salmaq dárejesi boıynsha ózara jeńimpazdardy anyqtady.
49 kılo salmaqta tarazdyq Ermek Mádıev aqtóbelik Qanaǵat Manatulynan basym tússe, 52 kıloda synǵa túsken Baqqoja Inaıatýlla (Qyzylorda) sport sheberinen úmitker Danııar Serikke (BQO) esh múmkindik bermedi.
Bul týrnırde erekshe aıqastyń biri 56 kıloda oryn aldy. Atalmysh salmaqta baq synaǵan jergilikti boksshy Oljas Qalaýbek pen ÁOSK (SSKA) atynan synǵa túsken Tastemir Bıbosynovtyń aıqasy jankúıerler kóńilinen shyqty. Alma-kezek soqqylardy aıamaı jumsaǵan bul aıqasta Qalaýbektiń baǵy jandy. Naq osy sportshy «Týrnırdiń eń úzdik boksshysy» ataǵyna ıe boldy.
Fınalǵa joldama alǵan taǵy bir ÁOSK-niń ókili Darhan Jumsaqbaev (60 kg) osynyń aldynda áriptesiniń ketken esesin qaıtaryp, aqtóbelik Zamanbek Danabekovten basym tústi de, týrnır jeńimpazy atandy.
64 jáne 69 kılo salmaqtarda jergilikti boksshylardyń mereıi ústem boldy. Tıisinshe, Meıirjan Pirtaev (64 kg) Ernur О́lmesbekten (Qyzylorda), Bekzat Halmetov (69 kg) Ahmet Mombekovten (OQO) jeńisti julyp aldy.
Al Baıanbek Sametov (75 kg, Almaty oblysy), Naýryz Saǵymbaev (81 kg, ÁOSK), Ádilet Orynbasarov (Astana) jáne Nursultan Amanjolov (91+ kg, Taraz) syndy boksshylar tóreshilerdiń bir aýyz sheshimimen jeńiske jetti.
Bir qyzyǵy, halyqaralyq degen mártebege ıe bul týrnırge kórshi О́zbekstan elinen 3 boksshy ǵana kelipti. Qalǵanynyń barlyǵy óz jerlesterimiz. Sebebin bilý úshin, osy týrnırdi uıymdastyrýǵa tikeleı jaýapty, Sıdneı Olımpıadasynyń kúmis júldegeri, búginde OQO bokstan olımpıada rezervin daıarlaıtyn balalar men jasóspirimderdiń mamandandyrylǵan sport mektebiniń dırektory Muhtarhan Dildábekovten suraǵanymyzda, ol bylaı dep jaýap qatty: «Tájikstan men Túrikmenstan eliniń boksshylary bizge kelý úshin ózbek jerinen ótedi. Sondyqtan, boksshylary vıza ashý kerek bolatyn. Vızasy der kezinde daıyn bolmaýynyń saldarynan olar bul týrnırge kele almady. Al qyrǵyz eli boksshylarynyń tizimin bekitip, bizge jibergen bolatyn. Alaıda, olar bul týrnırde tóbe kórsetpedi. Sebebin keıin anyqtaımyz», dedi Olımpıada júldegeri.
«Kórgen kózde jazyq joq» demekshi, týrnırdiń ashylý jáne jabylý saltanatyna Ábdisalan Nurmahanov shákirtteriniń tóbe kórsetpegeni qynjyltty. Bokstan Qazaqstan quramasynyń bas bapkeri retinde 1994 jyly jazǵy Azııa oıyndaryna, 1996 jyly Atlanta Olımpıadasyna jol bastap barǵanyn, sol dodalarda talaı qazaqtyń balasy jeńis týyn jelbiretkenin dúıim jurt biledi emes pe? Vasılıı Jırov AQSh-ta júr demeseńiz, elimizde júrgen qalǵan shákirtteri – Ermahan Ybraıymov, Bolat Jumadilov, Nurjan Smanov, Qanatbek Shaǵataevtyń bul týrnırde tóbe kórsetpegeni yńǵaısyzdaý boldy.
Sebebin bilý úshin sol baıaǵy Muhtarhan Dildábekovke júgindik.
«Barlyǵyna shaqyrtý jiberdik. Qazir eshkimge ókpeleýge bolmaıdy. Árqaısysynyń óz jumysy bar. Múmkin, kelesi jyly qonaq retinde keletin bolar. Al týrnırdiń deńgeıine keler bolsaq, 30 sáýirde Tashkentte Azııa chempıonaty bastalady. О́zge eldiń boksshylarynyń kelmeýiniń birden-bir sebebi osy. Qazaqstan qurama músheleri de Sary qurlyq dodasyna daıyndalyp jatyr. Sondyqtan, bıylǵy jarys Qazaqstan chempıonaty sekildi ótti. Bolashaqta týrnır deńgeıin AIBA-nyń «A» sanatyna deıin kóterý kerek. Sonda Shymkentke jyl saıyn keminde 15-20 eldiń boksshylary ózderi suranyp keletin bolady», – dedi Muhtarhan Qabylanbekuly.
Uıymdastyrýshylardyń aıtýynsha, keler jyldan bastap týrnırdi tek 75, 81, 91 jáne 91 kılodan joǵary salmaqta ǵana ótedi. Sebebi, naq osy salmaqtarda Ábdisalan Nurmahanov jas kezinen bastap eresekter dodasyna deıin baq synaǵan.
Almas Manap,
«Egemen Qazaqstan»
