Sharany ashqan komıtet tóraǵasy Birǵanym Áıtimova Elbasymyz óziniń «Bolashaqqa baǵdar: rýhanı jańǵyrý» baǵdarlamalyq maqalasynda bilim júıesiniń aldyna jańa mindetter qoıǵanyn atap ótti. Maqalada usynylǵan ıdeıalar, onyń ishinde erekshe oryn alatyn «bilimniń saltanat qurýy» ıdeıasy elimizdiń mektepteriniń kelbetin ózgertýge tıis. B.Áıtimova jınalǵandardyń nazaryn Memleket basshysynyń «Bolashaqta ulttyń tabysty bolýy onyń tabıǵı baılyǵymen emes, adamdarynyń básekelik qabiletimen aıqyndalady» degen sózine aýdardy.
Senat depýtattary aldynda Pavlodar oblysy ákiminiń orynbasary Meıram Begentaev baıandama jasady. Senattyń Áleýmettik-mádenı damý jáne ǵylym komıtetiniń músheleri de aımaqty aralaǵan eki kúnnen keıingi ózderiniń kórgen-túıgenderimen bólisip, usynystaryn ortaǵa saldy. Atap aıtqanda, depýtat Vladımır Redkokashın kópshiligi aýyldyq jerlerde ornalasqan shaǵyn mektepterdiń problemalaryn sheshý qajettigin atap ótti. «Mektepterdi ońtaılandyrý óte jaǵymsyz qubylys, tipti shalǵaıda jatqan eldi mekenderde de mektepterdiń jabylýyna jol bermeı, saqtap qalý qajet», − dedi senator.
Depýtattar Álı Bektaev pen Nurlan Qylyshbaev mundaı mektepterdi mamandarmen jáne qarjylaı qamtyp, birneshe pánderdi úılestire oqytyp júrgen muǵalimderge eńbekaqy tóleýdiń qaǵıdalaryn qaıta qaraýǵa shaqyrdy. Depýtattar Jabal Erǵalıev pen Tóleýbek Muqashev mektep oqýshylaryna patrıottyq tárbıe berý men ıntellektýaldyq jáne rýhanı damytý máselelerine, olardy shyǵarmashylyqqa, mýzyka, salt-dástúrleri men ádet-ǵuryptardy úırenýge tartýdyń keleshegine toqtaldy. Baıandamashylar, bul oraıda, basqa aımaqtar Pavlodar oblysynyń tájirıbesin paıdalana alatynyn atap ótti.
Áleýmettik-mádenı damý jáne ǵylym komıtetiniń tóraǵasy Birǵanym Áıtimova senatorlardyń usynystaryn qorytyndylaı kelip, Pavlodar oblysyna sapar ózekti jáne jemisti boldy dep málimdedi. Sapar barysynda depýtattar 40-tan astam qala jáne aýyl mektepteriniń jumysymen tanysý múmkindigine ıe boldy. Parlamentshiler Pavlodar, Aqsý men Ekibastuz qalalarynda, Aqtoǵaı, Qashyr, Lebıaji, Ýspen, Sharbaqty aýdandarynda ustazdar qaýymymen, oqýshylarmen kezdesti. Depýtattar aımaq bilim berý júıesiniń tabysty jumys isteýiniń úlgisi bola alady degen ortaq pikirge keldi.
Oblysta 3-ten 6 jasqa deıingi balalar mektepke deıingi bilimmen (keıbir aýdandarda, mysaly, Aqsý aýdanynda 2-den 6 jasqa deıingi balalar) tolyq qamtylǵan. UBT nátıjeleri boıynsha, tipti aýyl mektepteri jaqsy nátıje kórsetti. Depýtattar kóptegen mektepter shahmat, robotty tehnıka synyptarynyń bolǵanyna, joǵary jyldamdyqty ınternetpen, qazirgi zamanǵy sport jabdyqtarymen qamtamasyz etilgenine rıza boldy.
B.Áıtimova óz sózinde Bilim jáne ǵylym mınıstrligin shaǵyn mektepter máselelerin tıimdi sheshýge jáne muǵalimder eńbekaqysynyń laıyqty bolýy sheshýge shaqyrdy.
Komıtettiń kóshpeli otyrysynyń qorytyndylary boıynsha ústimizdegi jylǵy III toqsannyń sońynda Senatta «Orta bilim berý júıesin zańnamalyq retteýdiń ahýaly, problemalary men keleshegi» degen taqyrypta parlamenttik tyńdaý ótkizý josparlandy.
