Tek ótken táýlikte Taraz qalasy turǵyndarynan oblystyq Tótenshe jaǵdaılar departamentine jeke turǵyn úılerdiń aýlasyn sý basý týraly habarlamalar túsken. Nátıjesinde táýlik boıyna 16 adam, 5 birlik tehnıka, 4 motopompa kúshimen 30 úıdiń aýlasynan sý sorý jumysy júrgizilgen. Sonymen qatar, 27 adam jáne 2 tehnıkanyń kómegimen sý sorý, drenaj kanaldaryn qazý jáne tazartý jumystary da nátıjeli aıaqtalǵan.
Búgingi tańda Jambyl oblysynyń menshiginde 102 sý qoımasy bar. Onyń 69-y oblystyq «Jambyl sý qoımalary» kommýnaldyq memlekettik mekemesine qaraıdy. Atalǵan mekemeniń óndiristik-tehnıkalyq bóliminiń basshysy Maqsat Jumatov sý tasqynyn boldyrmaý jáne turǵyndardyń qaýipsizdigin qamtamasyz etý maqsatynda barlyq aýdannyń ákimdikterimen birlesip, táýliktik kezekshilik uıymdastyrylǵanyn, sondyqtan óńirde eshqandaı qaýiptiń joqtyǵyn aıtty.
Negizinen, oblystaǵy sý qoımalaryna Talas, Shý jáne Asa ózenderiniń 20-30 paıyzy kelip quıady. Búginde bul ózenderdegi jaǵdaı da turaqty. Sondaı-aq, Qoraǵaty, Tamdy, Shabaqty sııaqty shaǵyn ózender men taý sýlarynan, bulaq sýlarynan da keler qaýip joq.
Hamıt ESAMAN,
«Egemen Qazaqstan»
Jambyl oblysy
