Tótenshe jaǵdaı, ásirese, Atbasar aýdanynda aıryqsha sezildi. Onyń aldyn alý úshin Tótenshe jaǵdaılar komıtetiniń 9 dana tehnıkasy, 4 júzý quraly jáne 46 adamy iske qyzý kirisip ketti. Budan basqa, jergilikti polısııanyń 26 tehnıkasy men 70 qyzmetkeri jáne jergilikti atqarýshy organnyń 39 tehnıkasy men 154 adamy jumyldyrylǵan. Jalpy, tabıǵı apat oryn alǵannan bergi ýaqytta Atbasar qalasynda 454 turǵyn úı sýdyń astynda qaldy. Sý basqan aýmaqtardan 1379 adam ózge jerge kóshirildi. Sonymen qatar, 359 bas úı janýary da qaýipsiz jerlerge áketilgendigin aıta ketý kerek.
Atbasar aýdanynyń ákimi A.Nıkıshov plotına bógeti kúsheıtilmese zardap saldary budan da kólemdi bolar edi degendi basa aıtty. Onyń sendirýinshe, buǵan deıin tóselgen topyraq úıindisi sýǵa aıtarlyqtaı tosqaýyl bola alǵan. Búgingi tańda atbasarlyqtarǵa jan-jaqtan kómek kelýde. Arnaıy shtab qurylyp, sý apatynan zardap shekkenderge kómek kórsetý úshin aqsha, azyq-túlik jáne kıim-keshek jınalýda. Sonymen birge, medısınalyq kómek pen psıhologııalyq qoldaý kórsetý jumystary da keńinen júrgizilip jatyr.
Al Selınograd aýdanynda sý aǵyzý jumystary kúsheıe túsken. Iаǵnı, sý arnalaryn keńeıtý, bógetterdi nyǵaıtý jáne muzdardan tazartý qolǵa alynǵan. Jáne de 1700 dana qap tóselip, 1200 tonna ınertti materıaldar jetkizilgen. Taǵy erekshe atap keterligi, qaterli aýmaqtardan 17 myń tekshe metr qarǵyn sý soryp alynǵan. Arshaly aýdanynyń Jibek joly aýylynda sý deńgeıine monıtorıng júrgizilýde.
Jalpy qazirgi tańda Sandyqtaý, Balkashıno jáne Maksımovka eldi mekenderinde sýdan tazartý jumystary júrgizildi. 10 740 tekshe metr sý soryp alyndy. Tabıǵı apatpen kúresý kezeńinde tonaýshylyq pen qoǵamdyq tártipti qamtamasyz etý maqsatynda jergilikti polısııa qyzmeti tarapynan kezekshilik uıymdastyryldy.
Asqar TURAPBAIULY,
«Egemen Qazaqstan»
Aqmola oblysy
