Qustarǵa, tabıǵatqa degen janashyrlyq sharasy oblys ortalyǵyndaǵy Vorýshın saıabaǵynda bastaldy. Bul saıabaqty jazda jaqsy ózgerister kútip tur. ERG men oblys ákimdigi arasynda jasalǵan áleýmettik jobalar jónindegi memorandým aıasynda aǵymdaǵy jyly abattandyrý jumystary jalǵasady. Sondaı-aq, alıýmınıı zaýyty ujymynyń usynysymen «Metallýrgter alleıasy» ashylmaq. Al qustarǵa arnalǵan uıalar – abattandyrýdyń alǵashqy bastamasy deýge bolady.
– Saıabaqty metallýrgterdiń qamqorlyqqa alǵanyna biraz jyl boldy. Ár kóktem men kúzde osy baqty zaýyt jumysshylary, qyzmetkerleri retke keltirip, jınalyp qalatyn qoqysty shyǵarady. Búgin biz saıabaqta qustardyń da turaqtap, qalalyqtardyń kóńilin ásem áýenimen qýantyp tursyn degen nıetpen uıalar jasap, ildik, – deıdi «Qazaqstan alıýmınııi» AQ óndiristik qaýipsizdik, ekologııa jáne eńbekti qorǵaý departamenti bastyǵynyń orynbasary Renat Sarlybaev.
Oblys ortalyǵyndaǵy № 33 mekteptiń jas tabıǵat zertteýshileri tabıǵat qorǵaýǵa arnalǵan uransózder jazyp, qolóner buıymdaryn jasap ákelipti.
– Eshqandaı jip pen shegeni paıdalanbaı, uıalardyń kóldeneń aǵashyn butaqtar arasyna bekittik. Jel men týra túsetin kún sáýlesinen qorǵaý úshin sál eńkish ornalastyrdyq. Uıalardy qalaı bekitý kerektigin ekologııa jáne týrızm ortalyǵynda oqyp, bildik. Qysta uıa janyna jem-salǵysh ornatamyz. Qustardy aıalap, qamqor bolý kerek, – deıdi oqýshy Qanat Jamanov.
– Sáýirde qustar óz juptarymen uıa salatyn oryn izdeıdi. Qalalyq saıabaqqa uıa ornatý – óte ózekti shara. Sebebi, munda qustar uıa salatyn aǵashtar az, – deıdi ekologııa jáne týrızm ortalyǵynyń meńgerýshisi Valentına Shorohova.
Pavlodar oblysy
Farıda BYQAI,
«Egemen Qazaqstan»
Sýretti túsirgen Vıktorııa MAShKARINA
