Búgingi aıtpaǵymyz «Arbat» jaıly emes, on segiz jyldan beri osy «Arbat» alańynda otyryp sýret salatyn kásibı sýretshiler – erli-zaıypty Baqyt pen Gaýhar Nurbekovter týraly bolmaqshy.
Baqyt pen Gaýhar Qazaq memlekettik kórkemsýret akademııasyn birge bitirdi. О́ner tabystyrǵan jandardyń kórkem dúnıege degen ystyq mahabbaty móldir sezimge ulasyp, eki jas oqý bitirisimen otaý qurdy. «Arbat» alańy ónerinen násibin aıyryp otyrǵan jandardyń ekinshi úıine aınalǵaly qashan.
Kezinde shyǵarmashylyq ıelerin qoldaý maqsatynda almatylyq sýretshilerdiń «Arbatta» turyp sýret salýyna, týyndylaryn satýyna múmkindik jasalǵan edi. Sol úrdisti qazirgi qala basshylyǵy da jalǵastyryp otyr. Týyndylaryn satqany úshin sýretshiler salyq tólemeıdi, qylqalam sheberleriniń óner ortasy ispetti bul alańqaı.
Adamdy á degennen baýrap alatyn sýretterine qyzyǵyp turyp «Arbattyń» «turǵyny» Gaýhardy áńgimege tarttyq.
«Qudaıǵa táýbe, tabysymyz jaman emes. Sýret óneri kóp elderde óte joǵary baǵalanady. Elimizde de sýretshilerge aıtarlyqtaı kóńil bólinedi, degenmen, qylqalam ıeleriniń bárine birdeı qoldaý kórsetile bermeıdi. Jeke kórmeńdi ótkizý úshin qyrýar qarjy qajet. Kúndelikti bala-shaǵamyzdyń shaı-pulyn taýyp otyrǵan bizder úshin bul qıyn sharýa. Sondyqtan týyndylarymyzdy osynda ákelip saýdalaýǵa májbúrmiz», deıdi Gaýhar Nurbekova.
Jumys barysy kóz aldynda órbip, óziniń beınesin áp-sátte aınytpaı salyp beretindikten bolar, jaz ben kúz aılarynda ári-beri ótken halyqtyń portret saldyrýǵa qyzyǵýshylyǵy basym kórinedi.
– Stýdenttik kúnimde ultymnyń atyn uranǵa aınaldyratyn álemge áıgili sýretshi bolsam degen armanym bar edi. Ol armanymnan alystap qalsam da, ózim súıgen kıeli ónerdiń shetinde júrmin. Ulym da sýret salady. Men jete almaǵan shyńǵa sol jetse eken dep tileımin, – deıdi ol. Gaýhar Nurbekovanyń bul sózinen bir názik úmittiń sáýlesin kórdik. Bir ǵana Baqyt pen Gaýhar emes, osynda salǵan sýretin saýdalap turǵan óner ıelerimen áńgimeleskenimizde, olardyń kópshiligi joǵary bilimdi kásibı sýretshiler ekenin bildik. О́ner ıeleriniń armanyn «Arbat» aıalap tur dep aıtýǵa bolady.
Arman OKTIаBR,
«Egemen Qazaqstan»
ALMATY
