Smart Zholy jobasynyń sheńberinde qazaqstandyq baǵdarlamashylar men startaperler halyqaralyq kompanııalarmen birlesip ózderiniń ınnovasııalyq ónimderi men servısterin quraı alady. Bul biregeı baǵdarlama sanalady.
Smart Zholy aıasynda konkýrstyq negizde iriktelip alynǵan jastardyń 10 komandasy Sıngapýrdegi eki aptalyq baǵdarlama sheńberinde óz jobalaryn álemdik deńgeıdegi mentorlardyń tikeleı basshylyǵymen ıdeıasynan bastap bastapqy ónimin shyǵarýǵa deıingi joldan ótip iri azııalyq korporasııalarǵa usyna alady.
Qazaqstan Respýblıkasy Tuńǵysh Prezıdenti - Elbasy Qory Smart Zholy baǵdarlamasyn Ońtústik Azııadaǵy Echelon Asia Summit jetekshi startap-alańymen birlesip iske asyrady.
Baǵdarlama eki kezeńnen turady - birinshisi Astana, Almaty, Qaraǵandy jáne Pavlodar qalalaryn, ekinshi kezeń búkil eldi qamtıdy.
Konkýrstyń qorytyndysy boıynsha ótinim bergen 70 komandanyń ishinen 10 komanda iriktelip alynady. Olardyń arasynda úzdik álemdik joǵary oqý oryndarynyń túlekteri Princeton, UC Berkeley, Carnegie Mellon jáne basqalary, sondaı-aq qazaqstandyq Nazarbayev University, QBTÝ ýnıversıtetteri jáne basqalary bar.
Iriktelgen komandalar telekommýnıkasııalar, logıstıka, qarjy jáne densaýlyq saqtaý salasyndaǵy iri korporasııalardyń ótinimderi boıynsha jobalar ázirleıdi. Qazaqstandyq komandalar sıngapýrlyq startap - ekojúıesiniń ortalyǵynda ataqty Block 71-de ornalasady. Qatysýshylar elge qaıtyp oralǵan soń alǵan bilimderin bolashaq ázirlemelerinde qoldana alady.
Jobany tanystyrý rásimine qatysqan Aqparat jáne kommýnıkasııalar mınıstri Dáýren Abaev jas talanttardy qoldaýdyń mańyzdylyǵyna toqtaldy.
"Elimizdegi talantty jastardy qoldaýda Tuńǵysh Prezıdent qory kóp jumys atqaryp keledi. Búgin tusaýy kesiletin Smart Zholy jobasy da osyndaı mańyzdy sharalardyń biri ekeni anyq. Barshańyzǵa málim, qazirgi kúni elimizde Qazaqstannyń Úshinshi jańǵyrýy aıasyndaǵy keshendi is-sharalar bastaldy. Elbasy tapsyrmasyna saı, Aqparat jáne kommýnıkasııalar mınıstrligi de tehnologııalyq jańǵyrtýdy qamtamasyz etetin jobalardy, onyń ishinde «Sıfrlyq Qazaqstan» memlekettik baǵdarlamasyn ázirleýde" dedi Abaev myrza.
Buǵan qosa mınıstr tehnologııalyq jańǵyrtý máselesinde jastarǵa úlken senim artylyp otyrǵanyn aıtty. "Osy irgeli isterdi júzege asyrýda elimiz jańa býyn – jastarǵa úlken úmit artady. Sondyqtan da, Smart Zholy jobasynyń bastalýy jas startaperlerge shynaıy qoldaý bolatyny sózsiz. Jobaǵa qatysýshylar otandyq ınnovasııalyq ónimder qataryn arttyryp qana qoımaı, ozyq elderdiń aqparattyq tehnologııalar salasyndaǵy tájirıbesin el ıgiligine jaratady dep senemiz" dedi mınıstr.
Sonymen qatar Prezıdent Nursultan Nazarbaevtyń joǵary tehnologııalardyń jetisikterin qoǵamnyń ár salasynda tıimdi paıdalaný, tikeleı tapsyrmasy týraly aıtty.
«Smart Zholy» jobasyn iske asyrý jastardyń startaptaryn tek qana Qazaqstanǵa emes, ǵalamdyq naryqqa shyǵarý, Memleket Basshysynyń Joldaýynda qoıylǵan ekonomıkany jedel jańǵyrtý jáne sıfrlyq ekonomıkany qurý mindetin oryndaı otyryp, Astanany tehnologııalyq kartadaǵy jańa núkte retinde kórsete bilý bolyp tabylady, - dep atap ótti Qordyń atqarýshy dırektory Qanat Jumabaev.
Tusaýkeser sheńberinde Echelon Asia Summit (Sıngapýr) kompanııasynyń negizin birlesip qalaýshysy Tedıýs Ko, booking.com (Amsterdam) kompanııasynyń ınjener-baǵdarlamashysy Álibek Datbaev, Method.kz baǵdarlama jasaý mektebiniń negizin qalaýshysy Dagar Davletov, Malaızııadaǵy MultiMedia University doktoranty Maǵjan Qaıranbaı sóz sóıledi. Budan basqa 10 fınalıst komanda músheleri tanystyryldy.
«Biz qazaqstandyq startaptardy Sıngapýrde jáne Ońtústik Shyǵys Azııa elderindegi Echelon Asia Summit sammıtterinde qabyldap júrmiz jáne qazaqstandyq komandalardyń potensıalyn jaqsy bilemiz. Smart Zholy - qazaqstandyq jobalardyń somalyq kólemi 650 mln adamdy qamtıtyn álemniń iri naryǵyn qamtýdaǵy jańa deńgeıi», - dep atap ótti Tedıýs Ko.
