«Smart zholy» baǵdarlamasy Ońtústik Azııadaǵy «Echelon Asia Summit» jetekshi startap-alańymen birge júzege asyrylatynyn aıta ketken jón. Onyń basty elementi konkýrstyq negizde iriktelgen on jastar komandasy álemniń jetekshi tehnologııalyq habynyń biri – Sıngapýrdegi eki aptalyq baǵdarlama sheńberinde óz jobalaryn álemdik deńgeıdegi mentorlardyń tikeleı basshylyǵymen bastapqy ónimin shyǵarǵanǵa deıingi joldan ótip, iri azııalyq korporasııalarǵa usyna alady.
Jıyndy ashyp sóz sóılegen qordyń atqarýshy dırektory Qanat Jumabaev zamanaýı baǵdarlamanyń paıdasyn salmaqtap, onyń qazirgi tańdaǵy ózektiligin áńgimeledi. «Smart zholy» jobasyn iske asyrý jastardyń startaptaryn tek Qazaqstanǵa emes, ǵalamdyq naryqqa shyǵarady. Sonymen qatar, Memleket basshysynyń Joldaýynda júktelgen ekonomıkany jedel jańǵyrtý jáne sıfrlyq ekonomıkany qurý mindetin oryndap, Astanany tehnologııalyq kartadaǵy jańa núkte retinde kórsetedi», dep sendirdi ol.
Basqosýda Aqparat jáne kommýnıkasııalar mınıstri Dáýren Abaev atalǵan jobany Prezıdent bastamalarymen úndesken mańyzdy isterdiń qataryna jatqyzdy. «Barshańyzǵa málim, qazirgi kezde Qazaqstannyń Úshinshi jańǵyrýy aıasyndaǵy keshendi sharalar bastaldy. Memleket basshysynyń tapsyrmalaryna saı, Aqparat jáne kommýnıkasııalar mınıstrligi de tehnologııalyq jańǵyrýdy qamtamasyz etetin jobalardy, onyń ishinde «Sıfrly Qazaqstan» memlekettik baǵdarlamasyn ázirleýde. Osy irgeli isterdi júzege asyrýda elimiz jańa býyn jastarǵa úlken úmit artady. Sondyqtan da «Smart zholy» jobasynyń bastalýy jas startapshylarǵa shynaıy qoldaý bolatyny sózsiz. Jobaǵa qatysýshylar otandyq ınnovasııalyq ónimder qataryn arttyryp qana qoımaı, aqparattyq tehnologııadaǵy tájirıbelerin el ıgiligine jaratady dep senemiz», dedi mınıstr.
Tusaýkeserde basqa qatysýshylar da sóılep, oı-pikirlerin ortaǵa saldy.
Ashat RAIQUL,
«Egemen Qazaqstan»
