Senat Tóraǵasy Qazaqstan tarapy bul mańyzdy sharany joǵary deńgeıde uıymdastyrýǵa nıettenip otyrǵanyn habarlady. 1957 jyly qurylǵan Pagýosh qozǵalysy jahandyq aýqymda beıbitshilikti, qarýsyzdaný men ǵylymı yntymaqtastyqty jaqtaıtyn ǵalymdardy, saıası jáne qoǵam qaıratkerlerin biriktiredi.
Bul qozǵalys qarýsyzdaný jáne qaýipsizdik salasyndaǵy: Iаdrolyq qarýdy aýada, ǵarysh keńistiginde jáne sý astynda synaýǵa tyıym salý týraly shart, Zymyranǵa qarsy qorǵanys júıesin shekteý týraly shart, Bıologııalyq jáne hımııalyq qarý túrlerine tyıym salý týraly konvensııa, Eýropadaǵy jaı qarý-jaraqtar týraly shart jáne basqa da kóptarapty kelisimderdi ázirleý men qabyldaýda mańyzdy ról atqardy. Uıym 1995 jyly beıbitshilik salasyndaǵy Nobel syılyǵyna ıe boldy.
Q.Toqaevtyń aıtýynsha, Qazaqstan Pagýosh qozǵalysynyń ıdeıalary men qundylyqtaryn jaqtaıdy, qarýsyzdaný men qaýipsizdik salasyndaǵy halyqaralyq kelisimderdi ázirleý men qabyldaýdaǵy rólin joǵary baǵalaıdy. Qozǵalys músheleriniń Astanada osyndaı kezdesý ótkizýge nıet bildirýi bizdiń elimizdiń jáne Semeı ıadrolyq polıgonyn jaýyp, álemdegi tórtinshi oryndaǵy ıadrolyq qarýdan bas tartqan ári adamzatty ıadrolyq qaýipten qutqarý isine zor úles qosqan Prezıdent Nursultan Nazarbaevtyń halyqaralyq bedeliniń kórinisi bolyp tabylady.
