Asa mártebeli Nursultan Ábishuly!
Biz, Qazaqstannyń bir top shyǵarmashyl jastary Sizdiń «Bolashaqqa baǵdar: rýhanı jańǵyrý» atty Joldaýyńyzdyń maqsattary men ustanymdaryna qoldaý bildiremiz.
Búgingi jastar arasynda salamatty ómir salty men bilimdi bolý úlgige aınalyp, olar jańa kásip ıgerip, aǵylshyn tilin meńgerýge bar kúsh-jigerin jumsap júr. Álemdik ekonomıkalyq, ǵylymı keńistikke enýimizdiń alǵysharty álipbıimizdiń latyn qarpine aýysý bolǵandyqtan, biz Siz bastaǵan latyndandyrý jobasyn qoldaımyz.
Siz belgilegen «Týǵan jer», «Qazaqstannyń kıeli jerleriniń geografııasy», «Qazaqstannyń qasıetti rýhanı qundylyqtary», «Mádenı-geografııalyq beldeý» baǵdarlamalary arqyly árbir jas azamat óńirlerdegi tarıhı, mádenı, rýhanı oryndardy aralaý arqyly ulttyq tanymy keńeıedi jáne ulttyq qundylyqtaryn maqtan ete alady. Bul – otandyq brendtiń qalyptasýyna úlken úles qosatyn joba dep oılaımyz.
Siz mejelegen XXI ǵasyrdyń álemdik kartasynda eshkimge uqsamaıtyn, derbes orny bar ult bolýymyz úshin «Jahandaǵy zamanaýı qazaqstandyq mádenıet» jobasyna da qoldaý bildiremiz, ári sol maqsat jolynda aıanbaı eńbek etemiz. Joǵaryda atalǵan jobalardyń rýhanı, aqparattyq-tanymdyq aspektisi gýmanıtarlyq ǵylymdarǵa arqa súıeıtini málim. Sony eskerip, Siz «Jańa gýmanıtarlyq bilim. Qazaq tilindegi 100 jańa oqýlyq» atty jobasyn qurdyńyz. «Álemdegi úzdik 100 oqýlyqtyń» qazaq tilinde shyǵýy, jastardyń jańa zaman talabyna saı ıkemdelýine yqpal etedi. «Sanamyzdy ózgertpeı, sapamyzdy arttyra almaımyz» degen sózińiz, bizder taban tirer qaǵıdaly túsinik bolady.
Olaı bolsa, Sizdiń syndarly saıasatyńyzǵa árqashan qoldaý bildirip, Qazaq eliniń jalyndy jastaryna artqan senimińizdi aqtaýǵa ýáde beremiz.
Qazaqstannyń bir top shyǵarmashyl jastary:
Amanjol Áltaev, aıtysker;
Altynaı Nógerbek, teatr jáne kıno ártisi;
Ádil Ahmetov, teatr jáne kıno ártisi;
Dımash Qudaıbergenov, ánshi;
Janar DOǵalova, ánshi:
Aıgerim Beketaeva, balet solısi;
Erlan Rysqalı, dástúrli ánshi;
Aıbek Bekbosyn, kúıshi;
Aıdos Esmaǵambetov, músinshi;
Saltanat Ahmetova, opera solısi
