Keńes barasynda Memleket basshysy elorda aýmaǵyndaǵy birqatar kóshelerdiń boıynda qalanyń kórkin buzyp turǵan nysandar men jeke turǵyn úılerdiń sýretin kórsetti.
«Eski úılerdi súrip tastaý boıynsha jumystardy jandandyrý qajet. Dál osy jerlerge týrıster baryp, sýretke túsirip, barsha álemge kórsetedi», - dep eskertti Prezıdent.
Osy oraıda Memleket basshysy kósheniń kelbetin ásemdegenimen, nysandardyń artqy jaqtarynda kemshilikter bar ekenin qadap aıtty.
«Jumystardy tyńǵylyqty atqaryńyzdar. Qajet bolsa, arnaıy qarjyny bólý kerek. EKSPO aıasynda barlyǵyn tártipke keltirý múmkindigi bar. Osy jerlerde turǵyn úıler salynatyn bolsa, qurylysshylarǵa arzanǵa túsedi. Sebebi ortalyqta kommýnıkasııalar, jylý júıesi tartylǵan. Atap aıtqanda, qalanyń ortalyq aýdandaryn eski úılerden bosatý kerek», - dedi N. Nazarbaev.
Bul turǵyda Prezıdent eger de Parlamentte arnaıy zańnamany qabyldaý qajet bolsa, qujatty tezdetip engizýdi tapsyrdy.
«О́ıtkeni bul máseleler elordanyń, jalpy eldiń múddesin qamtıdy. Eshkim de alyp-satarlyqpen aınalysyp, bul eski úıler esebinen tabysqa kenelemin dep oılamaýy tıis», - dedi Elbasy.
О́z kezeginde Astana ákimi Áset Isekeshev osy baǵytta atqarylyp jatqan jumystar týraly aıtty.
«Qazirgi kezde 117 eki qabatty úı buzyldy. Jyl sońyna deıin 228-i súrilip tastalady jáne turǵyndardy jańa úılerge kóshirý jolymen 6 700 páter salynady. Jınaqtalǵan tájirıbeni, sondaı-aq bul baǵdarlamanyń bıyl aıaqtalatynyn eskere otyryp, ony qalalyq ortany qaıta jańartý baǵdarlamasyna eki baǵyt boıynsha masshtabtaýdy usynamyz», - dedi ákim.
Bul baǵyttaǵy usynystar maquldanǵan jaǵdaıda, baǵdarlamaǵa sáıkes, jeke turǵyn úıler men saıajaılar súriletin bolady. Olardyń ornyna qazirgi zamanǵy jaıly úıler salynady dep josparlanýda.
Osy oraıda, memleket basshysy Astana ákimine elordada jınaqy qurylys júrgizýdiń usynysyn engizýdi júktedi.
«Atap aıtqanda, qalanyń ortalyq aýdandaryn eski úılerden bosatý kerek. Eger de Parlamentte arnaıy zańnamany qabyldaý qajet bolsa, qujatty tezdetip engizińizder. О́ıtkeni bul máseleler elordanyń, jalpy eldiń múddesin qamtıdy. Eshkim de alyp-satarlyqpen aınalysyp, bul eski úıler esebinen tabysqa kenelemin dep oılamaýy tıis. Birinshi kezekte ınfraqurylymy bar aýmaqtardy ıgerý kerek. Sondyqtan da jazyqtaǵy alys aýdandarǵa qymbat ınfraqurylymdy tartý qajet bolmaıdy. Barlyǵy syrtqa qaraı umtylady. Jańa alańdarda qurylys júrgizýge tyıym salý kerek. Aldymen qalanyń ishin ıgerińizder, tek sodan keıin ǵana bul taqyrypty qarastyratyn bolamyz», - dedi N. Nazarbaev.
Prezıdent jınaqy ári tyǵyz qurylys júrgizý barlyq qalalarǵa tán qubylys ekenin atap ótti. Bul rette eski úıler buzylǵannan keıin, qalanyń ishindegi alańdardy ıgerip, sodan soń jańa bos alańdarda qurylys júrgizý máselesin talqylaýǵa bolatynyn jetkizip, baspana qurylysy jeke ınfestısııalar men memlekettik-jeke seriktestik esebinen júrgizilýi tıis ekenin atap ótti.
«Astana ákimine elordadaǵy qurylysty jınaqy júrgizý boıynsha usynys engizýdi tapsyramyn, sebebi jyl saıyn salyp jatqan baspanamyz artyp keledi. Sonymen birge memlekettik qordan páter alýǵa kezekke turǵandar sany da ósip otyr. Qandaı memlekettik qor? Biz naryqtyq kezeńde ómir súrip jatyrmyz ǵoı», - dep atap ótti Nazarbaev.
