Uıymdastyrýshylardyń aıtýynsha, aıtys eki kezeń boıynsha ótken. Birinshi kezeńde baıqaý komıssııasy elimizdiń 14 oblysynan kelgen 30 jas aqynnyń ónerin baǵalaǵan. Al, «Qazmedıa» ortalyǵy zalynyń sahnasynda ótken aqtyq saıysqa 10 aqyn qatysty.
Taqyryp bolashaqqa qatysty bolǵanymen jastar kókeıinde júrgen oı-pikirlerin, ıaǵnı, qoǵamdaǵy áleýmettik, saıası, rýhanı problemalardy árqaısysy ózinshe órnektep baqty. Súringen uıqastar, qısynsyz tirkester men jaıdaq qaljyńdar da bolmaı qalǵan joq. Atyn atap, túsin tústemeı-aq qoıaıyq, bir parasy bylaı bop keledi: «Men qalaı bul balaǵa baılanamyn, Aıbar-aý, tamasha eken saıraǵanyń» nemese «Tiriler kórinedi bıik bolyp, ústinde júrgennen soń ólgenderdiń», «Qabyrǵańa qara qandy ılep júrsiń», t.b. Árıne taýyp aıtylǵan, tapqyrlyqpen, utqyrlyqpen jetkizilip, tyńdaýshynyń kóńilinen shyqqan uıqastar da barshylyq. Onyń bárin tizip otyrý mindet emes. Bireýin aıtsaq ta jetkilikti shyǵar. Mysaly, semeılik Manarbek Satybaldın esimdi aqyn jýyrda ǵana shekarada bolǵan jaıǵa qatysty óz pikirin shıirip-shıirip ákep, «Kedende kempir tonap júrgenderdiń, О́lgende ókirgeni kimge dári?» túıindedi. Sondaı-aq, Arqalyq qalasy atynan qatysqan Toba О́tepbaev ta «jurttyń kóbi kúlkiden jyndy bolǵan» qoǵamdaǵy rýhanı, áleýmettik máselelerdi ashy tilmen túırep-túırep, qotyrǵa aınala bastaǵan jaralardyń betin tyrnaǵanyn, oıly óleńniń óresinen kóringenin aıtý abzal.
Saıystyń aqtyq synyna aıtylǵan on aqynnyń altaýy shyqty. Sonyń tórteýine báıgeniń júldesi buıyrdy. Atap aıtqanda yntalandyrý syılyǵymen, sondaı-aq, 50 myń teńge syıaqymen Aqmola oblysy, Ereımentaý aýdany atynan qatysqan Erlan Dáýletuly marapattaldy. Úshinshi oryn men 150 myń teńgeniń sertıfıkaty Qostanaılyq Núrııa Aqbabaqyzyna berildi. Ekinshi oryn ári 200 myńnyń sertıfıkaty qyzylordalyq Muhamedjan Mansurovty tapty. Al, aıtystyń birinshi orny hám 300 myń teńgelik syıaqy semeılik Nurjan О́mirbaevtyń qanjyǵasyna baılandy. Jalpy, aıtysqa qatysqan jas aqyndardyń eshqaısysy da eleýsiz qalǵan joq. Barlyǵyna Astana qalasy ákimdiginiń alǵys haty men aqshalaı syılyqtary tapsyryldy.
Aıta keteıik, L.Gýmılev atyndaǵy Eýrazııa ulttyq ýnıversıteti Jýrnalıstıka jáne saıasattaný fakýltetiniń dekany Qaırat Saq qazylar alqasyna tóraǵalyq etti. Jýrnalıster Qanat Áýesbaı men Serik Seıitman, «Bolashaq» qaýymdastyǵy atynan Baqytjan Ábdiraıymjanuly qazylar alqasynyń quramynda aıtyskerlerdi baǵalady. Al, aıtysty aqyn, «Daryn» syılyǵynyń ıegeri Qalqaman Sarın júrgizdi.
Aıgúl SEIILOVA,
«Egemen Qazaqstan»
Sýretti túsirgen Orynbaı BALMURAT
