Kórmege qostanaılyq 14 fotograf qatysty. Ár jyldary túsirilgen sýretterden kórermender ulttyq oıyndardy, salt-dástúrlerdi, tabıǵattyń ásem kórinisterin, halqymyz ónerin, aýyl ómirin tamashalady.
«Kórme taqyryby alýan túrli. О́z fotoreportajdarynda bizdiń fotograftar kóshpeliler urpaǵynyń ómirin beıneleıdi. Qazir fotoapparatpen túsirgen sýretter óte kóp ekenin bilemiz. Alaıda, kánigi fotograftardyń qoltańbasy tipti, ózgeshe ekenin moıyndaımyz. Olar sýretke óziniń jan jylýyn salady, sýret kádimgideı tiri ómir sekildi áser beredi. Al mundaı sýret túsirýge bilim men talant, erinbeıtin eńbek kerek», - dedi kórkemsýret galereıasynyń meńgerýshisi Saıa Qalıeva.
Kórmeniń ashylýyna sýretshiler, jýrnalıster, aqyndar men ǵalymdar qatysty. Onda sóılegender ózderine unaǵan sýretter jóninde pikirin irke almady. «Maǵan 3 sýret erekshe áser qaldyrdy. Sergeı Mıronovtyń «Qonaqjaılylyq» jáne «Arman», Oleg Iаblochkınniń «Aqsham aldyndaǵy sáıgúlikter» atty sýretter óte sátti, shynaıy shyqqan. Aýyldaǵy samaýryn qoıyp jatqan qazaq áıelderi, jylqy malynyń sulýlyǵyn tabıǵatpen qalaı astastyrǵany, sonymen qatar aýyldaǵy eski úı aldynda oıynshyq máshınemen oınap otyrǵan uldyń sýreti kórermendi ózine birden tartady», - dedi belgili qylqalam sheberi Oleg Kýskov.
Kórmege barlyǵy 29 sýret qoıyldy. Kórermenge rýhanı syılyq jasaǵan kórme avtorlarynyń atyn atap ótkendi jón kórdik. Olardyń barlyǵy da jýrnalısterdiń áriptesteri: Georgıı Shapovalov, Igor Valter, Ermurat Bekmuhamedov, Oleg Iаblochkın, Sergeı Mıronov, Vladımır Motorıko, Nıkolaı Kýdınov, Aıbek Júzbaı, Baǵdat Ahmetbekov, Sergeı Feldman, Mýhtar Sıbanbaev, Ivan Marmalıdı, Nıkolaı Savchenko, Nıkolaı Solovev.
Názıra Járimbetova
«Egemen Qazaqstan»
QOSTANAI
