Naıl SALIMOV,
Soltústik Qazaqstan oblystyq Qazaqstan halqy Assambleıasy hatshylyǵynyń meńgerýshisi:
– Elbasynyń tikeleı bastamashylyǵymen qurylǵan Qazaqstan halqy Assambleıasy aıasynda jumys isteıtin dostyq úıleri táýelsizdigimizge qaltqysyz qyzmet etip keledi. Egemendigimizdiń eleń-alań shaǵynan beri túrli saıası-mádenı sharalarǵa belsene aralasyp, qoǵam turaqtylyǵyn saqtaýdy, tatýlyqty, birlikti dáripteýdi, qazaq halqy men ózge de etnostardyń salt-dástúrlerin, ádet-ǵuryptaryn, mádenıetin, tilin nasıhattaýdy basty murat tutady. Osydan jıyrma jyl buryn etnomádenı ortalyqtardyń sany beseý ǵana bolsa, búginde Dostyq úıinde – 13, aýdandarda 106 qurylym jumys isteıdi.
Prezıdent «Bolashaqqa baǵdar: rýhanı jańarý» baǵdarlamalyq maqalasynda týǵan jerdi aıryqsha qasterleý, órkendetýge úles qosý shynaıy patrıotızmniń mańyzdy bóligi ekenin erekshe atap kórsetti. Osyǵan oraı «Týǵan jer», «Qazaqstandaǵy 100 jańa esim» baǵdarlamalary usynylyp, Týǵan elge – Qazaqstanǵa degen patrıottyq sezimdi qalyptastyrýǵa shaqyrdy. Bul turǵydan sóz qozǵaıtyn bolsaq, dostyq úıleri tarapynan atqarylyp jatqan sharalar qyzyqtylyǵymen, mazmundylyǵymen erekshelenedi. Olar uıymdastyratyn sharalarǵa jastar úlken ynta jigermen qatysyp júr. Mektepter janynan etnoklýbtar ashylyp, belsendi ókilder tartyldy. Kolledjder janynan qurylǵan «Beıbitshilik jáne kelisim» ortalyqtary da ómirsheńdigin tanytty. Úlken El – Úlken otbasy», «Uly Dala eli – Táýelsizdiktiń 25 negizi» búkilhalyqtyq aksııalar barysynda úsh júzden astam ıgilikti sharalar atqarylyp, birlik pen yntymaqtastyń ónegeli úrdisteri keńinen túsindirildi.
Lázzat JALMUQANOVA,
№17 ulttyq órkendeý-mektep kesheniniń dırektory:
– Jahandaný úrdisi erekshe beleń alyp, túsiniksiz qubylystar kóbeıgen tusta óskeleń urpaq boıyna Memleket basshysy belgilep bergen «Máńgilik El» qaǵıdattaryn uıalatý óte mańyzdy. Jýyrda baspasózde jarııalanyp, jurtshylyqtyń erekshe qyzyǵýshylyǵyn týdyrǵan maqalada buqaralyq sana-sezimniń «otbasy, oshaq qasy» aıasynda qalýy saldarynan týyndaıtyn kókeıkesti jaıttar ashyq aıtylyp, bilimdi, kózi ashyq, kókiregi oıaý urpaq tárbıeleý jaıyna basa nazar aýdaryldy. Osydan shırek ǵasyr buryn shańyraq kótergen bilim uıasynda toǵyz etnostyq bólim jumys istep, eki júzge jýyq bala bilim alady. Olardyń arasynda ana tilin erkin meńgerip, tól mádenıetimen jete tanysqysy keletinder qatary kóp. «Qazaqstan – ortaq úıimiz», taǵy basqa taqyryptar sheńberinde otanshyldyqqa tárbıeleý taǵylymdary úzbeı nasıhattalady. Bul máseleler oqý baǵdarlamasynda da jan-jaqty qamtylǵan.
«Qaıyrymdylyq kerýeni», «Jaqsylyq jasa!», «Shyn júrekten» aksııalarynan jınalǵan 4,5 mıllıon teńge syrqat balalardyń muqtajyna jumsaldy. Dostyq úıleriniń Analar keńesimen birlesip ótkizgen sharalary da qoldaýǵa turarlyq. Máselen, «Aq oramal» aksııasyna 6500 adam qatysyp, 14 eldi meken qamtyldy.
Rashbıl EVDAEV,
«Evreı mádenıeti» oblystyq qoǵamdyq birlestiginiń tóraǵasy
– Dostyq úıleriniń etnosaralyq kelisimdi nyǵaıtýdaǵy róli ólsheýsiz ekenin kúndelikti jumys tájirıbesinen aıqyn baıqaımyz. Olardyń qabyrǵalarynda ótetin is-sharalar eshkimdi de beı-jaı qaldyrǵan emes. «Salt-dástúr» etnomádenı festıvaldary, «Alǵys aıtý» merekeleri adamdardyń bir-birine degen shynaıy qurmet sezimin oıatyp, odan ári jaqyndastyra tústi. «Máńgilik El» patrıottyq aktisin talqylaý barysynda el birligin, yntymaǵyn saqtaýǵa qatysty tanymdyq oılar sabaqtalyp, Elbasynyń ult pen ulystardy ortaq maqsatqa jeteleýdegi janqııarlyq eńbegi erekshe atap kórsetildi.
Biz qaıyrymdylyq aksııalaryna da qatysyp turamyz. Turmysy tómen, kóp balaly otbasylarǵa, az qamtylǵan jandarǵa birneshe márte qarjylyq kómek kórsetildi.
Otan– qasterli de qasıetti uǵym. Men Ázerbaıjanda týsam da, sanaly ǵumyrym Qazaqstanmen taǵdyrlas. Aǵa urpaqtyń jaqsy dásúrlerin jas býyn jalǵastyrsyn desek, kez kelgen eldiń qýaty – halqynyń birliginde, túsinistik tini – bir shańyraq astynda toptasýynda ekenin jete uǵyndyra bilgen abzal. Búgingi kúni etnostyq tózimdilik, sabyrlylyq aýadaı qajet. О́zara syılastyq pen senimge qurylǵan Qazaqstannyń tańdaýy aıqyn. Dostyq úıleri birlik qaǵıdasyn berik ustanymǵa aınaldyrǵan. Ana tildi meńgerý, salt-dástúrlerdi úırený, merekelik sharalardy uıymdastyrý barysynda etnomádenı birlestikterge únemi qoldaý kórsetip, uıytqy bolyp keledi. Budan bylaı da etnosaralyq qatynastardy toptastyrýshylyq róli artpasa, kemimek emes.
Iá, yntymaǵy jarasqan eldiń bolashaǵy qashanda jarqyn. «Baqyt baǵalaı bilgenniń ǵana basynda turady» dep tekke aıtylmasa kerek. О́ńirdegi dostyq úıleri men olardyń belsendi qatysýshylary da Elbasynyń «Turaqtylyq – bizdiń tatýlyǵymyz berik bolýy úshin taban tireıtin tuǵyrymyz» degen sózderin basty baǵdar etken.
О́mir ESQALI,
«Egemen Qazaqstan»
Soltústik Qazaqstan oblysy
