Dóńgelek ústel basynda saıasattanýshylar men sarapshylar Memleket basshysynyń Qazaqstannyń Úshinshi jańǵyrýy sheńberinde belgilegen tapsyrmalaryn oryndaýǵa baılanysty Konstıtýsııa jańa jaǵdaıda qalaı jumys isteıtini jóninde ózderiniń usynystary men pikirlerin ortaǵa saldy. Retine qaraı sóz alǵan spıkerler, ásirese, elimizdiń saıası júıesiniń ári qaraı damýyna, ishki saıasatty transformasııalaýdyń perspektıvalaryna, azamattyq qoǵam qalyptastyrý jáne qazaqstandyq qoǵamdy shoǵyrlandyrý úderisterine basa nazar aýdardy. Qatysýshylar, sondaı-aq, parlamentarızm ınstıtýtyn damytý men memlekettik basqarýdyń tıimdiligi jóninde de pikir almasty.
Atalǵan osy máselelerge qatysty «Nur Otan» partııasy janyndaǵy Saıası saraptama jáne strategııalyq zertteýler ortalyǵynyń dırektory Iýlııa Kýchınskaıa, Bilim jáne ǵylym mınıstrligi Ǵylym komıteti Memleket tarıhy ınstıtýtynyń bas ǵylymı qyzmetkeri Erkesh Nurpeıisov, Qazaq gýmanıtarlyq zań ýnıversıtetiniń prorektory Mıras Dáýlenov jáne basqalar óz oılarymen bólisti.
Eldiń bolashaǵyna baılanysty máseleler qozǵalatyn osyndaı jıyndar men dóńgelek ústelderdiń ashyq pikir almasý jaǵdaıynda ótkeni jaqsy. Odan qazaqstandyq qoǵam utpasa, utylmaıdy. Mysaly, osy dóńgelek ústelde «Aımaq» óńirlik damý jáne jergilikti ózin-ózi basqarýǵa járdemdesý qorynyń tóraıymy Aıgúl Soloveva óńirlerdegi qoǵamdyq keńesterdi ákimdikter janynan qurý kerek degen usynys aıtty. «Men qoǵamdyq keńester máslıhattar janynda bolýy tıis degen tujyrymmen kelise bermeımin, – deıdi ol osy jóninde. – Sebebi, osyǵan qa tysty bul jerde eki palataly máslıhat degen oı keledi. Al qoǵamdyq keńester táýelsiz bolýy tıis nemese olar ákimdikter janynan qurylǵany jón. О́ıtkeni, qoǵamdyq keńester keńes bere otyryp, atqarýshy organdar qalyptastyratyn baǵdarlamalarǵa jumyldyrylady».
A.Solovevanyń pikirinshe, ortalyq deńgeıdegi qoǵamdyq keńester ortalyq organdar janynan qurylǵan. Bul – durys. Al óńirlik deńgeıde olardy máslıhattar janynda shoǵyrlandyrǵan. Ásili, máslıhattar derbes bolýy tıis jáne jańǵyrý úderisterin júzege asyrý úshin qoǵamda bolyp jatqan úderisterge tıisti dárejede yqpal etýi qajet. О́ńirler deńgeıinde máslıhattar ákimdikterden belgili bir dárejede araqashyqtyqty saqtaǵany jón. «Qazaqstannyń Úshinshi jańǵyrýy damýdyń belgili bir vektoryn aıqyndap otyr, – dedi ol. – Osy baǵytta alǵa qoıylǵan maqsattarǵa azamattyq qoǵam da belsene qatysady».
Dóńgelek ústel basyndaǵy ashyq pikir almasqan jıyndy Qazaqstan Respýblıkasynyń Tuńǵysh Prezıdenti – Elbasy qory janyndaǵy Álemdik ekonomıka jáne saıasat ınstıtýtynyń dırektory Erjan Soltybaev qorytty. «Jalpy alǵanda, kons-
tıtýsııalyq reformalarǵa qatysty buryn da, qazirgi kezde de aıtylǵan usynys-pikirler qazaqstandyqtardyń konstıtýsııalyq reforma úderisine qatysýǵa degen qyzyǵýshylyq deńgeıiniń artqanyn kórsetti, – dedi ol. – Bul rette atalǵan máseleler sarapshylar deńgeıinde de, jalpy qazaqstandyqtar arasynda da keńinen talqylandy. Elbasymyzdyń «Bolashaqqa baǵdar: rýhanı jańǵyrý» baǵdarlamalyq maqalasynda kórsetilgender Qazaqstannyń tolyqqandy kemeldenýiniń basty alǵysharty bolyp tabylady. Sonymen qatar, azamattyq qoǵamdy kúsheıtýge múmkindik beredi».
Álısultan QULANBAI,
«Egemen Qazaqstan»
