О́tken jylǵy chempıonattyń júldegerleri jankúıer qaýymdy asa tartysty jáne tartymdy oıynmen rıza etti. Bir qaraǵanda, eki dop aıyrmashylyǵymen alda turǵan jáne bir oıynshysy artyq pavlodarlyqtar jeńisti endi ýystan shyǵarmaıtyndaı-aq kóringen. Biraq almatylyqtar aldap soqty. Ujym 1:3 esebimen utylyp jatsa da, unjyrǵasyn túsirmeı, on oıynshymen júrip-aq esepti teńestire bildi. Bul oıynda «Ertistiń» shabýylshysy Aslan Darabaevtyń úsh oıynshyny aldap ótip, alystan teýip ádemi gol soqqanyn aıta ketken jón. Sóıtip, buǵan deıin týrnır kestesinde ekinshi jáne úshinshi kele jatqan qos klýb mańyzdy eki upaıdan joǵaltyp, jaǵdaılaryn birshama nasharlatyp aldy.
О́zin ókshelep kele jatqandar osylaısha ıtjyǵys túsip jatqanda, top basyndaǵy «Astana» qarqynǵa qarqyn qosyp, qara úzip ketti. Temirjolshylar bul joly syrt alańda «Tarazdy» iri eseppen tas-talqan etip utty. Qazir «Astananyń» jeke-dara kósh bastaǵany óz aldyna, olardyń basqalarǵa qaraǵanda bir oıyny kem.
Shymkent baryp, jergilikti «Ordabasymen» oınaǵan «Tobyl» kútpegen jerden jeńiske jetti. О́z alańynda qandaı da bolsyn qarsylasqa ese jibere qoımaıtyn ońtústik fýtbolshylary bul joly jankúıerlerin jerge qaratty. Osy jeńisten keıin qostanaılyq ujym týrnır kestesinde «Qaıratty» tómen syrǵytyp, úshinshi satyǵa kóterildi.
Úzdik altylyqtyń qataryna ený úshin qyzý tartys júrip jatyr. Týrnır kestesinde kórshi turǵan «Aqjaıyq» pen «Qaısar» arasyndaǵy matchta Oral fýtbolshylarynyń mereıi ústem boldy. Sóıtip, olar «Qaısarmen» aradaǵy bes upaı aıyrmashylyǵyn ekige deıin qysqartyp, jetinshi orynǵa tabandy nyq tiredi.
Segizinshi týrda «Aqtóbe» men «Shahter» jáne «Atyraý» men «Oqjetpes» komandalary arasyndaǵy oıyndar Aqtóbe men Kókshetaýdaǵy stadıondardyń maýsymǵa daıyn bolmaǵandyǵynan keıinge shegerildi.
Segizinshi týrdaǵy oıyndar mynadaı nátıjelermen aıaqtaldy:
«Ertis» – «Qaırat» – 3:3 (3:1), Goý, 5 (0:1). Jıvkovıch, 13 – penaltıden (1:1). Darabaev, 29 (2:1). Dja Djedje, 40 (3:1). Ilıchevıch, 61 (3:2). Islamhan, 88 (3:3). «Ordabasy» – «Tobyl» – 1:2 (1:0), Kovalchýk, 45 (1:0). Janǵylyshbaı, 64 (1:1). Despotovıch, 68 (1:2). «Astana» – «Taraz» - 4:0 (3:0), Grahovas, 13 (1:0). Kabananga, 33 (2:0). Jalmuqan, 43 (3:0). Kabananga, 84 (4:0). «Akjaıyq» – «Qaısar» – 1:0 (0:0), Valıýllın, 56 (1:0).
Surmergender kóshin burynǵysha «Qaırattyń» shabýylshysy Jerar Goý bastap keledi. Onyń enshisinde 8 gol bar. Al ekinshi orynǵa bıylǵy maýsymda óziniń 5-shi golyn soqqan Jýnıor Kabananga («Astana») kóterildi.
29 sáýir kúni ótetin 9-týrda komandalar mynadaı jup qurap, ózara tartysqa túsedi:
«Oqjetpes» – «Aqtóbe», «Taraz» – «Atyraý», «Qaısar» – «Astana», «Qaırat» – «Aqjaıyq», «Shahter» – «Ordabasy», «Tobyl» – «Ertis».
Qaırat ÁBILDINOV,
«Egemen Qazaqstan»
