Aıta ketsek, mektep túlekterine tegin bilim, ıaǵnı grant utyp alýǵa múmkindik beretin, sondaı-aq, daryndy oqýshylardy qoldaý maqsatynda bıyl altynshy ret uıymdastyrylyp otyrǵan Y.Altynsarın olımpıadasy 3 naýryz kúni Bilim basqarmalarymen, aýdandyq bilim bólimderimen birlese otyryp respýblıkamyzdyń birqatar oblystarynda, al 17 naýryz kúni alǵash ret halyqaralyq deńgeıde О́zbekstan, Qyrǵyzstan, Monǵolııa elderinde ótkizilgen edi.
Elimizde ótken atalmysh baıqaý qazaq tili men ádebıeti, orys tili men ádebıeti, aǵylshyn tili, fızıka, bıologııa, geografııa, tarıh, hımııa jáne metematıka pánderi boıynsha ótkizilse, sheteldik talapkerler qazaq tilinen test tapsyrý, esse jazý jáne mánerlep oqý boıynsha 3 kezeńnen turatyn synnan ótip, baqtaryn synady. Eń joǵarǵy kórsetkishi 100 balldyq bilim saıysy 2012 jyldan beri Qyzdar ýnıversıtetiniń basshysy Dınar Nóketaevanyń bastamasymen ótkizilip keledi.
Bıylǵy «Y.Altynsarın-2017» pándik olımpıadasyna elimizdiń barlyq oblystarynan 4000-ǵa jýyq oqýshy qatyssa, shet elderde ótken bilim synaǵyna 500-den astam mektep oqýshylary qatysqan.
Olımpıada qorytyndysy boıynsha shet elde ótken bilim saıysynda 22 oqýshy, respýblıka boıynsha 27 oqýshy jeńimpaz atandy. Elimizdegi olımpıada deńgeıinen ótken 1253 qatysýshy Qyzdar pedagogıkalyq ýnıversıtetiniń oqý tólemaqysyna jeńildik beretin arnaıy sertıfıkattarmen marapattaldy. Atalmysh sertıfıkatqa sheteldik 136 mektep bitirýshi ıe boldy.
Saltanatty marapattaý rásimine ýnıversıtet basshylyǵymen qatar, elimizdegi olımpıada júldegerleri, О́zbekstan, Qyrǵyzstan, Monǵolııanyń jeńimpaz atanǵan oqýshylary men olardyń ata-analary, ustazdary qatysty. Alǵash ret halyqaralyq deńgeıde ótken olımpıada jeńimpazdaryn marapattaý qurmeti elimizge belgili qoǵam qaıratkeri Murat Ábenovke berildi.
«Kóp jyldyq tarıhy bar, bedeli bar aıryqsha oqý ornynyń bul olımpıadany ótkizýi úlken mańyzǵa ıe. Elimizdegi pedagogıka salasyn damytý, onyń ishinde ár pán boıynsha jaqsy mamandar daıyndaý, barlyq kezde bar jaǵynan aldyńǵy qatarda bolý kez-kelgen oqý ornynyń qolynan kele bermeıdi. 60 myńnan asa pedagogtardy daıyndap shyǵarǵan kıeli shańyraq – Qyzdar ýnıversıteti Ulttyq reıtıng boıynsha pedagogıkalyq joǵary oqý oryndary arasynda 1 orynǵa ıe bolyp qana qoımaı, QS Stars University Ratings halyqaralyq reıtıngisi boıynsha úsh juldyzdy tuńǵysh qazaqstandyq pedagogıkalyq ýnıversıtet atanyp otyr. «Ustazdar ustahanasy» sanalatyn Qyzdar ýnıversıtetiniń qazaq qyzdaryna shet elde bilim alýǵa múmkindik beretin Qosdıplomdy bilim berý baǵdarlamasynyń engizilgeni qýantty. Bul olımpıadanyń Qazaqstanda ǵana emes, halyqaralyq deńgeıde ótýi jastarǵa berilgen úlken múmkindik», – dedi Murat Ábenov.
Shara barysynda «Talent Management Centre» JShS bas dırektorynyń birinshi orynbasary Dıdar Boltaev, О́zbekstan Respýblıkasynyń Qazaq mádenı ortalyǵy, Bilim jáne ǵylym departamenti tóraǵasynyń orynbasary Klara Sadyrbaeva, Monǵolııa Respýblıkasy Baıan-О́lgıı aımaǵy Bilim, mádenıet, óner basqarmasynyń qazaq tili mamany Ásemgúl Ibragımqyzy jáne ózge de qonaqtar sóz sóılep, sheteldik qandas qyzdarymyzǵa berilip otyrǵan úlken múmkindikter úshin oqý ornynyń basshylyǵyna rızashylyqtaryn bildirdi.
«Eki el arasyndaǵy dostyq qarym-qatynasty nyǵaıtýda mádenıet, sportpen qatar, bilim salasyndaǵy yntymaqtastyq sharalarynyń da orny erekshe. Biz sheteldegi aǵaıyndardyń balalaryn da syrt qaldyrmaı, óz otandarynda bilim alýǵa múmkindik berip otyǵan Qyzdar ýnıversıteti basshylyǵyna sheksiz alǵysymyzdy bildiremiz», – dedi ózbekstandyq qonaq Klara Sadyrbaeva.
О́zbekstan Respýblıkasy boıynsha birinshi oryn jeńimpazy Merýert Perneeva men Mońǵolııa Respýblıkasy boıynsha birinshi oryn ıegeri, Baıan О́lgıı aımaǵy, Rýhanııat mektebiniń 12 synyp oqýshysy Júzik Tóleýhan tebirene sóz sóılep, qýanyshtaryn jyr joldarymen jetkizip, arnaý óleńderin oqyp berdi.
Shara aıasynda qonaqtar ýnıversıtet kampýstaryn, kitaphana men sport keshenderin aralap, ár mamandyq týraly tolyq maǵlumat, usynylatyn jeńildikteri týraly aqparattar aldy.
Mıra Baıbek,
«Egemen Qazaqstan»
Almaty
