Sport merekesiniń ashylý saltanatynda sóz alǵan oblys ákimi Nurlan Noǵaev: «Elbasymyz qazaqstandyqtardy turaqty túrde sportpen aınalysýǵa shaqyrady jáne osy iste úlgi bolyp keledi. Búginde atyraýlyqtardyń 25 paıyzy sportpen shuǵyldanady. Prezıdent tapsyrmasyna sáıkes buqaralyq sportty damytýda Atyraý aımaǵynda ilkimdi ister bar. Oblys ortalyǵynda ǵana emes, aýyldarda da sporttyq nysandar kúrdeli jóndeýden ótip, jańadan salynyp jatyr. Sporttyń qaı túrimen de aınalysýǵa múmkindik bar» - dep atap ótti.
Jarys nátıjesinde komandalyq esep boıynsha Iran elinen kelgen sportshylar birinshi oryndy jeńip aldy. Koreıa ekinshi, Taıland úshinshi orynnyń máresinen kórindi. Al tórtinshi oryndy qazaqstandyqtar enshiledi.
Chempıonat qonaqtarynyń jarystan tys ýaqyttaryn tıimdi paıdalaný maqsatynda Jaıyq jaǵasynda etnoaýyl boı kóterdi. Ol jerde ulttyq qundylyqtarymyz meımandar nazaryna usynyldy. Sondaı-aq, «Atyraý» dene shynyqtyrý-saýyqtyrý kesheniniń aldynda Azııa taekvondoshylarynyń alleıasy paıda boldy. Ekologııalyq «Baıtaq Bolashaq» alıansy qala kóshelerine tal ekti. Sharaǵa taekvondo Azııa birlestiginiń prezıdenti Lı Kýı Sııýk, Beıjiń Olımpıadasynyń qola júldegeri Arman Shylmanov, QR taekvondo federasııasynyń atqarýshy dırektory Maqsat Ibraev pen oblystyq taekvondo federasııasynyń prezıdenti Arman Toǵaevtar qatysty.
Baqytgúl Babash,
«Egemen Qazaqstan».
Atyraý
