Oblys ákimi Qumar Aqsaqalov BAQ ókilderimen kezdeskende, qyzyl sý shaıyp ketken aımaqtarǵa baryp, zardaptardy joıýǵa, eldi mekenderdi abattandyrýǵa bir kisideı qatysýǵa, jappaı senbilikter uıymdastyrýǵa shaqyrǵan bolatyn. Baǵaly bastamaǵa ún qosqan «Nur Otan» partııasynyń músheleri, jastar, úkimettik emes uıymdardyń ókilderi Ǵ.Músirepov aýdanyndaǵy Rýzaevka aýylynda senbilik uıymdastyrdy. Máslıhat depýtattary turmystyq tehnıkalarmen, azyq-túlikpen, qurylys materıaldarymen, keńse taýarlarymen járdemdesti. Olarǵa turǵyndar da qosylyp, qaıyrymdylyq aksııasyna belsene qatysty.
Qumar Irgebaıuly tabıǵı apatty bastan ótkergen úılerde bolyp, jaǵdaılarymen tanysty. Arnaıy qurylǵan komıssııa óz jumysyn aıaqtap, shyǵyndardy eseptep shyǵardy. «О́tken joly ýáde etkendeı barlyq qajetti sharalardy jasaıtyn bolamyz», dedi ol. Gýmanıtarlyq kómekter basqa óńirlerden de kelip jatqanyn jetkizdi.
Osynda jarty ǵasyrǵa jýyq turatyn Anna Sımonenko qýanyshta da, qaıǵyda da birge bolatyn Elbasyna degen rızashylyǵyn bildirdi. «Balalarym Reseıde turady. Men týǵan Otanymda qalýdy jón sanadym. Eń bastysy, elim, jerim aman. Eshqandaı kemdik kórip otyrǵan joqpyn», deıdi tolǵana sóılegen keıýana.
Ortalyqtandyrylǵan aýdandyq aýrýhananyń Rýzaev bólimshesiniń meńgerýshisi Vıtalıı Chıchkannyń aıtýynsha, dárigerlik-ambýlatorııada dári-dármek jetkilikti.
Tutastaı alǵanda, oblysta jaǵdaı turaqty. Shal aqyn, Esil aýdandarynda sý basý qaýpiniń seıilgeni baıqalady. Petropavl qalasyndaǵy №12, 13, 14 mektepterde evakýasııalyq beketter uıymdastyrylǵan.
О́mir Esqalı,
«Egemen Qazaqstan»
Soltústik Qazaqstan oblysy
