Muhtar Áýezovtiń týǵanyna 120 jyl tolýyna oraı «Áýezov oqýlary-HV: Qazaqstannyń Úshinshi jańǵyrýy: jańa tujyrymdamalar men zamanaýı sheshimder» taqyrybynda ótken halyqaralyq konferensııaǵa AQSh, Ulybrıtanııa, Germanııa, Fransııa, Japonııa, Reseı, Ońtústik Koreıa, Qytaı, Malaızııa, Túrkııa sekildi memleketterden belgili ǵalymdar qatysty.
Otandyq joǵary bilimniń eksporttyq áleýetin arttyrýǵa yqpal etetin konferensııa barysyndaǵy pikirtalas alańynan týǵan oı kóp. Talaby talantymen ushtasqan ult urpaǵy bilim alyp, ilim úırengende ǵana, Elbasy maqalasynda aıtylǵandaı, ózgelermen ıyq tiresedi. Memleket basshysy «Bolashaqqa baǵdar: rýhanı jańǵyrý» maqalasynda taıaý onjyldyq ýaqytta qazirgi kásipterdiń jartysy joıylyp ketetinin eskertti.
«Ekonomıkanyń kásiptik sıpaty buryn-sońdy eshbir dáýirde munshama jedel ózgermegen. Biz búgingi jańa ataýly erteń-aq eskige aınalatyn, júrisi jyldam dáýirge aıaq bastyq. Bul jaǵdaıda kásibin neǵurlym qınalmaı, jeńil ózgertýge qabiletti, asa bilimdar adamdar ǵana tabysqa jetedi. Osyny bek túsingendikten, biz bilimge bólinetin bıýdjet shyǵystarynyń úlesi jóninen álemdegi eń aldyńǵy qatarly elderdiń sanatyna qosylyp otyrmyz, delingen Elbasy eńbeginde. Osy oraıda, ýnıversıtet stýdentterdiń bilim-biligin arttyrý úshin shet elderdegi áriptestermen tyǵyz baılanys ornatyp, bilim sapasyn halyqaralyq dárejege kóterýde. Konferensııa maqsaty da bilim sapasyn jaqsarta túsip, Elbasy eńbeginde aıtylǵan básekelik qabiletti arttyrý», deıdi M.Áýezov atyndaǵy Ońtústik Qazaqstan memlekettik ýnıversıtetiniń rektory Jumahan Myrhalyqov.
Al ońtústikkoreıalyq ǵalym, tehnıka ǵylymdarynyń doktory Kım Hýand Don búgingi zaman aǵymyna qaraı qurylys salasy da ınnovasııalyq ıgilikterge toly ekenin aıtty.
«Bizdiń munda kelgendegi maqsatymyz da sol – saladaǵy zamanaýı jańalyqtarmen bólisý. Bul bilim ordasynyń oqytýshylar men stýdentteri bizdiń elge jıi keledi. Bilgenimizben bólisip júrmiz. Ǵylym men bilimdegi jańashyldyqty jarııa etýden jalyqpaımyz», deıdi ǵalym.
M.V.Lomonosov atyndaǵy Máskeý memlekettik ýnıversıtetinde kóptegen qazaq jastary bilim alýda. Konferensııaǵa óziniń ǵylymı eńbekterin ala kelgen ýnıversıtet qyzmetkeri, professor Olga Malıkovanyń aıtýynsha, Qazaqstannyń sońǵy ýaqyttaǵy jetistikteri, ásirese, syrttan qaraǵan janǵa aıqyn seziledi. Sondaı-aq, ǵalym óndiris salasy qarqyn alǵan Qazaqstanda shıkizat qory mol ekenin, ony óndirý jaǵynan bilikti maman daıarlaýdy da qolǵa alyp, búginde mol jetistikke qol jetkizilgenin atap ótti.
EKSPO-2017 halyqaralyq kórmesin ótkizý aıasynda jańartylǵan energetıka, energııa saqtaýshy tehnologııalar men resýrstar; tirshilik qaýipsizdigi jáne qorshaǵan ortany qorǵaý, «Qazaqstannyń úshinshi jańǵyrýy» aıasynda óndiristi avtomattandyrý men IT-tehnologııalardy damytý, úshtildilik jalpyulttyq ilgerileý, básekege qabiletti tulǵany tárbıeleý men damytýdaǵy sporttyq-saýyqtyrý aspektileri syndy birneshe baǵyttar boıynsha seksııalyq jumystar júrgizilgen konferensııa barysynda Elbasy N.Nazarbaevtyń «Qazaqstannyń Úshinshi jańǵyrýy: jahandyq básekege qabilettilik» atty Joldaýyn júzege asyrýdyń ózekti máseleleri talqylandy.
Sadybek BEISENBAEV,
pedagogıka ǵylymdarynyń doktory
ShYMKENT
