Búginde Taraz – Jambyl oblysynyń oratalyǵy jáne jarty mılıonnan astam turǵyny bar, Qazaqstannyń ońtústik iri ındýstrıaldy jáne mádenı ortalyǵy. Tarıhı eskertkishterge baı qorynyń arqasynda shahardyń týrıstik áleýeti zor. 2011 jyly bastalǵan kóne shahardyń arheologııalyq qazba jumystary eki myńjyldyq tarıhy bar biregeı artefaktilerge qol jetkizýge múmkindik berdi.
Ǵalymdardyń aıtýynsha munda asfalt astynda eski qala bar jáne onyń jasy kem degende eki myńǵa jetedi.
«Alty jyl qatarynan kóne Taraz qalasynyń keńaýqymdy arheologııalyq qazba jumystary júrgizilýde. Osy ýaqyt aralyǵynda arheologtar VI-XII ǵasyrlarǵa tıesili shamamen 50 myńdaı artefakt tapty, olar ortaǵasyrlyq qamal, VIII - IX ǵasyrlardaǵy meshit, medrese, otqa tabynýshylardyń mehraby, zyndan, kóne Talas ózeni saǵasynyń jaǵasy, turǵyn úılerdiń irgetastary», - dep ákimdikten tolyqtyrdy.
20 gektar alqapqa sholý munarasy, Dostyq úıi men kongress-holly bar etnomádenı ortalyq, «Taraz sazdary» stelasy, «Myńbulaq» saıabaǵy, qazba jumystary barysynda tabylǵan eksponattar qoıylǵan mýzeı nysany ornalasty.
Tabylǵan kóne zattar naqyshyna keltirilip salynǵan oıý órnekterge baı jáne qoldan jasalǵan. Qysh ydys aıaqtary, altyn, shyny men metalldan jasalǵan zattarda bar. Sankt-peterbýrg Ermıtajynan kelgen shyǵystanýshy-mamandar az ýaqytta kóptep tabylǵan tarıhı qundylyqtarǵa joǵary baǵa berdi.
Endi belgili bolǵandaı, Qazaq handyǵynyń 550-jyldyǵyna oraı ashylǵan «Kóne Taraz» respýblıkalyq mańyzdaǵy tarıhı eskertkish – arheologııalyq park EKSPO-2017 halyqaralyq kórmesiniń qonaqtary aralaıtyn qalalar tizimine engizildi.
