"Qazirgi kezde biz ulttyq ınvestısııalyq strategııany ázirlep jatyrmyz. Ol da - Prezıdenttiń tapsyrmasy. Osy jumysqa xalyqaralyq sarapshylar tartylyp otyr. Sondaı-aq, biz ózimizdiń aımaqtaǵy áriptesterimizge osy máseleniń mańyzdylyǵyn túsindirdik. Sebebi dál sol aımaqtarda kóptegen máseleler týyndaıdy. Endi, biz, Úkimette otyrǵandar, ınvestısııalyq saıasatty ózgertýdiń qajettiligin jaqsy túsinemiz. Sol sebepti osy saladaǵy jumystyń aımaqtarda turalap qalǵanyn qalamaımyz. Sondyqtan oblys ákimderiniń ınvestısııalar jónindegi orynbasarlarymen qosymsha keńester ótkizdik. Biz keıbir basshylardyń osy salada jumys isteýge áli de daıyn emes ekenin baıqadyq. Tildi tıisti deńgeıde bilmeıtinderi de kóp nárseni ańǵartady. Iá, olardyń basqa da jumystary da jetip artylady. Ony da bilemiz. Osyǵan baılanysty biz Prezıdent Ákimshiligine tıisti xatty ázirlep jatyrmyz. Investısııalardy tartý jumysyn retke keltirý kerek", - dedi Saǵyntaev búgin Qazaqstannyń ınvestısııalyq áleýetin tanystyrýǵa arnalǵan sharada.
Atalǵan sharada QR Investısııalar jáne damý mınıstri Jeńis Qasymbek pen "Kazakh Invest" ulttyq kompanııasynyń basshylyǵy shet memleketterdiń elshilerine ınvestısııalardy tartý, shetel ınvestorlaryna yńǵaıly jaǵdaı jasaý salasyndaǵy jumystar jaıynda baıandap berdi.
Premer-Mınıstrdiń aıtýynsha, búginde shetel ınvestısııalaryn tartýdyń burynǵy júıesi tolyǵymen ózgertildi. Osy salada arnaıy "Kazakh Invest" ulttyq kompanııasy quryldy. Al kompanııanyń dırektorlar keńesi Úkimet basshysy dárejesine deıin kóterildi.
"Keńestiń tóraǵasy men bolamyn. Biz dırektorlar keńesiniń mártebesin ádeıi kóterdik. Sonyń ózi ınvestısııalyq saıasattyń basymdyǵyn, Qazaqstan úshin qanshalyqty mańyzdy ekenin kórsetse kerek", - dep atap kórsetti Saǵyntaev.
