Saltanatty sharaǵa Batys Qazaqstan oblysynyń ákimi Altaı Kólginov, Oral qalasynyń ákimi Narıman Tóreǵalıev, Qazaqstan Respýblıkasy Qorǵanys jáne aeroǵarysh mınıstri Beıbit Atamqulov, Qazaqstan Respýblıkasy Qorǵanys mınıstriniń orynbasary, general-maıor Talǵat Janjúmenov, Qazaqstan Respýblıkasy Qarýly Kúshteri Áskerı teńiz qyzmetiniń Bas qolbasshysy Jandarbek Januzaqov, «Qazaqstan Injınırıng» Ulttyq kompanııasy» AQ-nyń Basqarma tóraǵasy E.S.Idrısov, QR Qarýly kúshteriniń ardagerleri, «Zenıt» zaýytynyń ujymy, «Mańǵystaý» kemesi ekıpajynyń jeke quramy qatysty.
«Mańǵystaý» – «Zenıt» zaýytynyń konveıerinen shyqqan 26 keme. Ol Qazaqstan Respýblıkasy Qarýly Kúshteriniń Áskerı teńiz qyzmeti úshin memlekettik tapsyrys boıynsha jasalynǵan. Budan burynǵy kemelerden ereksheligi – bul korabldiń qarý-jaraǵy jetildirilgen: sý astynan keletin qaýipti dıversııalyq áreketti, júzbeli qarsylasty anyqtaıtyn jáne qarsylyq kórsetetin qondyrǵy ornatylǵan, keme qurylysy kezinde buǵan deıin jasalǵan korablderde qyzmet etýshi áskerı teńizshilerdiń aqyl-keńesteri eskerilgen. Osylaısha, áskerı kemeniń manevr múmkindikteri artyp, áskerı qýaty kúsheıip, ekıpaj músheleri úshin jaıly bola túsken.
Aıta ketý kerek, Qazaqstan Respýblıkasynyń Kaspıı teńizindegi shekarasyn qorǵaý maqsatynda shyǵaryla bastaǵan zymyrandy-artıllerııalyq kemelerdiń alǵashqysy 2012 jyly 25 sáýirde sýǵa túsirilgen bolatyn. 0250 jobasymen bastalǵan bul korabl – «Qazaqstan» ataýyn ıemdendi. Odan keıin 2013-2014 jyldary zaýyt konveıerinen shyqqan «Oral» jáne «Saryarqa» urys kemeleri teńiz qyzmetine attandy.
Qazbek Quttymuratuly,
Oral
